Vawiin khan Sawleng khawtlangin Pu Lalchhandama Ralte, School Education Minister lo lawmna hun an hmang. 

He hunah hian Minister chuan thusawiin Party inthliarna dah bovin ram hmasawn nan i thawk ang u a ti a. Sorkar tharin hun rei lote chhungin thawm a nei tan a, mipuite tana tha ber turin hna a thawk zel dawn a ni a ti. Khawtlang hmasawnna tura auhla an neihte tipuitling thei dinhmunah mipuiin an hlangkai avangin mipuite chu tawngtaina nen tawiawm tlat turin a sawm a, kawng laklawha tawpsan mai lo tur leh tawiawm tlat turin a sawm bawk. Minister chuan khawtlang hruaituten khawtlang mamawh an thlente chu uluk taka an thlir hnuah a theih ang anga bawhzui a nih tur thu leh hma a lak tur thu a sawi.

Pu C.Lalmuanpuia, MLA pawhin he hunah hian thusawiin Ministry tharah sorkar tharin zirna lamah theihtawp a chhuah dawn a, he ramah dikna leh rorelna tha a awm theih nan mipuite chu thawhpuiah a sawm a ni. Zirlai thiam thei leh harsate tan incentive pek an nih tur thu a sawi bawk. Zirlaite chu ram nghahfak an nih avangin zirna lamah tan la turin a sawm a ni. 

Education Minister Pu Lalchhandama Ralte hi nizan khan Darlawnah a riak a, Sawleng a tlawh hma hian tukin khan Darlawn-ah SDEO office leh quarters sak that dan tur leh Middle school building-a Higher Secondary  school dah dan turte a hmunah a en a. School Department Director leh officer dangten an tawiawm a, School thuneitute nen thiltih dan tur an sawiho nghal a ni. 

Minister lawmna hunah hian Minister hi a nupui Pi Flora Rosangpuii, Pu C.Lalmuanpuia MLA, Pu K.Laldingliana Director School Education, Pu Lalhmunsanga Hnamte Director LESDE te leh Education Dept officer thenkhatten an tawiawm a. Sawleng khawtlang hruaitute, tlawmngai pawl hruaitute leh School naupang leh zirtirtute lawmna hunah hian an tel a ni.