Vawiin khan Hmarphei Zirlai Pawl (HZP) chuan an tlangdung khaw 9 atanga HSLC leh HSSLC pass tharte, Graduation leh Masters Degree la tharte chawimawina hun an hmang a. Parliamentary Secretary Pu Lal Thanzara chu khuallian niin Tuirial Bialtu MLA Pu Hmingdailova Khiangte leh Serlui Bialtu MLA Pu K. Lalrinthanga te chu khual zahawm an ni.

Pu Lal Thanzara chuan zirlai pass tharte a lawmpui thu sawiin theihtawp chhuah a tang sauh sauh turin a fuih a. Taima taka an zir chuan Mizoram pum tihmingthatu an ni thei a ni, a ti. Zirlai pawl hrang hrangin zirlai tithate chawimawi nachang an hria chu fakawm a tih thu sawiin chutihrualin zirlai pawl hruaitute chu politics kawng sial na tur ngawt ngaihtuah lova zirlaite hmasawnna ngaihtuahtu, an harsatnate sutkian tumtu hruaitu tha ni turin a fuih bawk. Parliamentary Secretary chuan Mizoram hmasawnna hna hrang hrang sorkarin a thawhmek te tarlangin Pathian thu in min hrilh angin malsawmna tawng baw tur chuan thuawih leh tihnuam kan nih a tul a, sorkar tha nei tur chuan mipui tha kan nih a tul a ni, a ti a. Zirlai kan ni emaw, sumdawng, politician, sorkar hnathawk, lo nei mi pawh ni ila mahni dinhmun theuhah Pathian tih mi, mi thahnemngai kan nih a pawimawh a ni, a ti bawk.

He huna thusawitu dang Youth Commission Chairman Pu Hmingdailova Khiangte chuan zirlaite fuihin Mizote intodelhna tur kawng awlsam leh tha ber chu Education a ni, a ti a. Zirna hi a tlo a, a daihrei a, zirna tha hian kan ram a khaichhuak thei a ni, a ti a. MLA Pu K. Lalrinthanga pawhin zirlaite fuihin tunlai khawvel inelna sang takah hian pass ringawt duh tawk lova mahni zirlai theuhah a tithaber nih tum turin a fuih a ni.

Vawiin inkhawmah hian Hmar phei tlangdung khaw hrang hrang atangin zirlai 56 te hnenah chawimawina Certificate hlan an ni.