No.3879/2020-2021
Aizawl the 6th August, 2020: Home Department chuan vawiin khan thuchhuah siamin, passenger leh passenger phur lirthei te Thawhtanni (Monday) atanga Inrinni (Saturday) ah zing dar 6 atanga chhun dar 12 inkar Vairengte entry point an paltlang phalsak a nih tawh tur thu mipui a hriattir. He hmalakna hi 27.07.2020 a Chief Secretary hova video conference meeting neih a mipui him tlan nan leh chet lak awlsam zawk na tura thutlukna lo siam tawh bawhzuina a ni a. Khualzin tur te pawh an tan harsatna a awm loh nan entry-point hawn hun chhung mil hian an zin hun pawh siamrem turin a chah a ni.
Vairengte entry-point ah hian bungraw phur lirthei chu nitin darkar 24 chhung an kaltlang phalsak an ni.
Mizoram state pawn atanga passenger phur lirthei lo lut reng reng chu chhinchhiahna sticker (fluorescent orange colour) "BOUND FOR QUARANTINE" tih inziak chu motor windscreen chung veilamah bel vek a ni ang.
Heng bakah hian, state pawn atanga passenger phur lirthei lo lut an awmin Vairengte/Bairabi/Kanhmun police check gate an tlan pelh atanga darkar khat chhungin Officer-in-charge, Vairengte/Bairabi/Kanhmun te chuan an Deputy Commissioner theuh te hnenah District Control Room emaw State Control Room kaltlangin heng lirthei te detail kimchang hi an hrilhhre thin tur a ni.
