Chief Minister chuan ‘ Mizoramah pawikhawihna chi hrang hrang a thleng ta fo mai hi hnam angin a zahthlak hle a ni’ a ti. He thu hi vawiina a office conference room-a ‘hmeichhiate leh kumtlinglo te chunga hleihlenna leh thih dan pangngai ni lova thihna thlen’ ( Crime against women and child & other prominent unnatural death) tih chungchang sawihonaa a sawi a ni.

Chief Minister chuan Mizoramah pawikhawihna hrim hrim a thleng tam ta lutuk hi sorkar chuan a ngaihven hle a ni tih sawiin, engtinnge hetiang thil duhawmlo thleng hi a ven dan kan siam anga, a tih reh dan kan ngaihtuah ang tih sawiho tura inkokhawm kan ni a ti a. Kawng hrang hranga tan lak dan tur sorkar ang leh pawl ang te a ngaihdan an neihte kalkhawmte chu sawi turin a sawm a ni.

Sawihonaah hian pawngsual chungchang, a bikin kumtlinglo pawngsual te, mihringte buma nawhchizawrh luih tirna te, hmeichhiate chunga tharum thawhnate, information technology hmanga (cyber crime) mobile a zahmawh rawngkai thu inthawnte leh ruang chhar leh mahni intihhlum chungchangte sawiho a ni a. Heng pawikhawihna hrang hrang thleng thin te lakah a ven dan tur leh hmalak dan turah nasa thei ang bera thil tul leh pawimawhte chhiar theih leh thlir theih tura puanzar (awareness) a, zirlaibua chhawp chhuahte chu thil tul hmasa nia an hriat thute an sawi a. Tunlai khawvel thang zelah Cyber Crime Police Station te pawh neih ve a tul tawh thute sawilan a ni bawk a ni.

Hmeichhiate chunga hleihlenna hrang hrang, pawngsual, pawngsual tum, tharum thawh, zahawmna tihbawrhban leh nawhchizawrh luih tirnate kum 2011 chhung khan vawi 168 a thleng a, 2012 ah 19, ruang chhar 12, 2012 ah 4, mahni intihlum 105, 2012 ah 8 leh tual thah 27, 2012 ah 3 a thlen thu tarlan a ni.

Sawihonaah hian Home Minister Pu R.Lalzirliana, Social Welfare Minister Pu P.C.Lalthanliana, Chief Secretary Pu Van Hela Pachuau te bakah Officer lian tak tak te, NGO atangte leh social activists atangte in aiawh an tel a ni.