Mizoram Bamboo Day hmasa ber chu March 3 2012 ah hman a ni dawn a. Hemi chunchanga programme duanlawk tawh thlirhona leh a kaihhnawih pawimawh dangte relin Pu R.L. Rinawma IRS Principal Secretary leh Chairman Organizing Committee Mizoram Bamboo Day Celebration ni bawk hovin a pisa ah vawiin khan Organizing Committee an thukhawm a.

 Mizoram Bamboo Day Celebration atan programme duan lawk ang chuan March ni 2 2012  khian Bamboo Exhibition-cum-Sales chu Assembly Annexe ah Pu S Hiato Industries Minister in a hawng ang a. He Exhibition ah hian Mizoram bakah Nagaland, Tripura leh Sikkim atangin mau hmanga thil siam chi hrang hrangte pholan a ni ang, stall 26 vel awm tura beisei a ni.

 Mizoram Bamboo Day hmasa ber hawnna programme chu March ni 3 2012 a Aijal Club a Chief Minister Pu Lal Thanhawla’n a hmanpui ang a. Hawnna programme ah hian Pu S Hiato, Industries Minister; Pu H Rohluna, Environment & Forest Minister ; Anup K Pujari IAS, Director General, Foreign Trade, Govt. of India ; Kameshwar Ojha, Dy. Director General, National Bamboo Mission; Kamesh Salam, Founder & Exe. Director, South Asia Bamboo Foundation; Paul Muktieh CMD, NEDFi; Sudhir A Merchant, Chairman, SHEFEXIL, Kolkata leh EXIM Bank atangin – Shonly Litting leh Vanlalruata Fanai te  tel tura beisei an ni a.

 Hemi ni vek hian ‘Bamboo –Technology, Livelihood, Export Potential & Prospects’ tih thupui hmangin Seminar & Interactive Session neih a nih bakah Best Village leh mau hmanga thil siam thiam te hnenah lawmman hlan a ni bawk ang.

Mizoram Bamboo Day Celebration, Organizing Committee chuan February ni 27 chhun dar 12:00 hian Aizawl Press Club-ah thuthar thehdarhtu kawmna hun buatsaih an tum bawk a ni.