Nimin chawhma dar 10:00 khan Pi Renu Sharma,IAS, Commissioner/Secretary,GAD, Planning, Finance etc chuan Saiha DC Office tlawhin, sanctioned post awm zat te, la hnawhkhah lo awm zat te, District Innovation fund hman dan te leh DC office dinhmun, hmalakna leh harsatna an neih te DC office a officer te nen an sawiho. DC office a tlawh zawh hnu hian NLUP Line Department-a Head of Office te DC Conference Hall-ah NLUP Review Meeting a neih pui nghal a ni. He review meeting-ah hian Line department hrang hrang ten an hmalak tawhna leh hmachhawp te tarlangin report an pe a. Pi Renu Sharma-i chuan officer kalkhawm te chu NLUP hlawtlinna tur a theitawp chhuah a beneficiary te zirtir na leh kaihruaina pek a, an hnathawh vil ngun turin a chah hlawm.

Nimin vek chhun dar 12 Noon-ah Pi Renu-i chuan MADC tlawhin, MADC hotute nen inkawmna hun reilote an neih a.MADC hotute chuan sorkar laipui (Central) atanga fund lo kal te hi state sorkar chuan ni 15 chhunga Autonomous District council-ah a release vek tur a nih laiin thla tam tak ti khawtlai a ni thin thu te pawh sawilan a ni.

Pi Renu Sharma-I hian nimin chawhnu dar 2:00 -a DC Conference Hall-a Task Force committee leh kangmei tuartute inkawmna hun reilote a hmanpui a. He meeting-ah hian February 13 a Superintendent of Police,Saiha District leh staff ten M16 leh amu 156, walky talky(Handset)- 2 leh magazine 2 Laki khaw bula an man lawmpuina thilpek mi 11 hnenah a hlan nghal bawk.