Sawrkar laipuiin thupek a siam bawhzuiin nizan zanlai atang khan India ram pumah Mizoram huapin Rs 500 leh Rs 1000 note te chu tihthih a ni a. Hemi chungchangah hian sawrkar chuan kalphung mumal tak a kalpui nghal avangin tumah lo chi-ai lo turin Chief Secretary Pu Lalmalsawma chuan vawiin khan mipuite a ngen.
Pu Lalmalsawma chuan he thil avang hian ni 2/3 chu harsatna engemaw tawk kan awm pawhin hei hi ram pumin a thatpui tur thil a nih avangin mipui tan manganna tur a awmlo tih a sawi a. Ram chhunga pawisa lem virvel leh chumiin a hrin chhuah ralthuam, drugs dan lova India rama tawlh luh leh sum chheprelh tibo tura sawrkar laipui hmalakna a nih thu sawiin heng thil thalo avang hian sawrkarin chhiah a hmuh tur ang a hmu thei thin lova, chuvang chuan mipuite hmasawnna than a thu thin a ni.
Rs 500 leh Rs 1000 currency note-te hi thlak a ni dawn a, Rs 500 chhuak tur, design leh colour mawi danglam tak leh Rs 2000 note te RBI chuan a duang tawh a. Note thar te hian Mizoram a lo thleng thuai dawn a ni.
He thil thleng avanga sawrkarin ruahmanna a siam hrang hrangte chu :
1. Bank te chu an inpuahchah fel nan 9.11.2016 hi chawlhah puan a ni a. 10.11.2016 ah hawn leh a ni ang.
2. ATM zawng zawng, Cash Deposit Machine leh Cash recyclers, pawisa lut/chhuak sawngbawlna hmunte te 9th leh 10th November, 2016 ah te khar an ni ang.
3. Pawisa note hlui Rs 500 leh Rs 1000 te hi 30th December, 2016 hma in mahni Bank account-a dah emaw, note danga thleng tur a ni a. Identity Card kengin Bank-ah leh Post Office ah te Rs 4000 aia tamlo pawisa a thleng theih ang., Ni 15 ral hnuah pawisa thleng theih zat Rs 4000 chu thlirnawn a ni ang a, a tul chuan tihsan a ni ang.Note hlui mahni bank account a deposit theih zat bituk a awm lo.
4. Mi pakhatin ATM atanga pawisa a lak chhuah theih zat hi ni 1-ah Rs 2000 a bituk a ni a, November 19 atang chuan card pakhat in ni 1 ah Rs 4000 a lakchhuah theih ang.
5. Pawisa fai tawhchet ngailova account khawih entir nan cheque, demand draft, credit/debit card, mobile wallet leh electronic fund transfer te chu a ngaiin a kal reng thung ang.
6. Mipui ten harsatna an pumpelh theih nan 8th November, 2016 zanlai atanga chhuta darkar 72 chhung chu sawrkar damdawiin ah te, damdawi zawrhna, railway ticket lakna, sawrkar enkawl ticket counter, mitthi sawngbawlna hmun te, airport-ah te, consumer, co-operative society dawrah te, bawnghnute zawrhna hmunah te, public sector oil marketing company enkawl petrol/diesel leh gas station ah te chuan pawisa hlui hi pawm tura tih a ni.
7. Bank counter kal tlangin mahni bank account atangin vawi khatah Rs. 10,000.00 a lak chhuah theih ang a, kar khat chhungin Rs. 20,000.00 aia tam lakchhuah eraw a theih lo hang.
Dt. 9.11.2016 a chhuak Newspaper thenkhatah hemi chungchang hi famkim lo deuha tih chhuah a ni a, chuvangin mipuiten a kimchanga an hriat theih nan he thil hi siam a ni.
