Vawiin chhun dar 12:00 hian Home Minister Pu R. Lalzirliana chuan, Serchhip Police Station Building thar, Rs 57.20 lakhs senga sak chu a hawng.

A hawnna inkhawm, Police Station tuala neihah Home Minister chuan, Bible ah, LALPAN khawpui a vawn loh chuan a vengtute chu an meng rim thlawn mai a ni, tih kan hmuh angin, kan Police ten theihtawp an chhuahna Pathianin mal a sawm avangin vawiin thlengin ram ralmuang takah kan cheng thei a, kan vannei hle a ni, a ti a. Mizoram Police te chu India ram State zinga Conviction rate nei tha ber pawl an ni a, hei hian an in thlahdah loh zia a tichiang hle a ni, a ti. Minister hian, kumin Christmas leh Kumthar lo thleng tur chu Halpuah/Halmawi leh a mu nei Silai lem tel lova hman a nih tur thu sawiin, khawtlang hruaitu zawng zawngte chu tun atanga mipuite lo hrilh uar tan turin a ngen a ni. Serchhip-in Police Station thar an nei chu lawmawm a tih thu sawiin Serchhipa Law and Order fail sawi tur a awm meub lo chu entawn tlak a tih thu leh Chief Minister bial niawm renga mipuite nun a mawia a hriat thu a tarlang a ni.

Pu. R. Lalzirliana chuan, tun hnaiah ruihhlo zuarten man tlawm taka kan thalaite hnena ruihhlo an hralh thin thu sawiin, zu a ni emaw ruihhlo eng chi pawh, ruih hrim hrim hi dan kalh a nih avangin tunah hian nasa zawka hmalak chhoh zel ani a. Khawm Case a mante dahna tur bik pawk siam niin hawn theih tep a ni tawh a, dan bawhchhiaa ruih chingte hi kan umzui zel dawn a ni, a ti. Pu R. Lalzirliana hian Police Department tih changtlunna tur hnathawh hrang hrangte, remna leh muanna vawnhima a awm zel theihna tura hmalakna te, leh sawrkarin hmasawnna hna a thawh hrang hrangte a tarlang bawk.

Home Minister tawiawmtu Lt Col. ZS Zuala, Parliamentary Secretary for Home pawhin thusawina hun hmangin, tunhnaia Mizoram Home Department hmasawnna hrang hrangte a tarlang a. Serchhip in Police Station tha tak an nei thar chu a lawmpui thu a sawi bawk.

Er. Lalhmingsangi, SDO, PWD Project Sub-Division, Serchhip chuan technical report a pe a. Serchhip Police Station a dung feet 70, avang feet 30 a ni a, room 8 leh Toilet 3 a nei a, tunah hian Ground Floor chauh la peih niin a chungah hian SDPO Office leh thildang la chhunzawm tum a ni. Contractor hi Pu Ralzatawna, Serchhip niin Dt 25.6.2012 atangin a sa tan a, Completion Cost hi Rs 57.20 Lakh a ni.

A hawnna inkhawm Pu Lalringdika, Serchhip SP in a kaihruaiah hian, DGP Pu Lalthianghlima Pachuau pawhin thusawina hun a hmang bawk a, Serchhip DC Dr. Lalrozama, DIG Northern Range Pu. LT Hrangchal leh Serchhipa District Officer zawng zawng bakah YMA aiawhte, Chanchinbumite, khawtlang hruaitute leh midang thahnem tak a hawnna ah hian an tel a ni.