Mizoram Finance Department chuan tun hnaia cheng 500 leh cheng 1000 note tih tawp chungchangah mipui hriattur in a hnuai ami ang hian thuchhuah a siam :

Central Sorkar-in ni 8.1 1.2016 zan khan Rs. 1,000 leh Rs. 500 note te hman zui theih loh tura tih thih a nih thu ram mipuite hmaah a puang a. Hei hian engemaw chenah mipui te harsatna a thlcn tih Finance Department chuan a hria a, pawi a tih rualin he harsatna hi hun rei lote chhunga chinfel leh mai tur a nih vangin mipuite lo mangang lo tur leh lo buai chi-ai lo turin a chah a ni.

Tunah hian Finance Department, Government of Mizoram te, Reserve Bank of India te leh State Bank of India te chuan pheikhai rual takin he harsatna hi a rang lama sukiang turin chak takin hma an la reng a, ni hnih ni thum hnuah chuan kan harsatna zualpui hi a kiam mai kan beisei a ni. Tunah hian India ramah chhiah awlruk a nasa em em a, chhiah awlruk avangin ram hmasawnna hnathawhna tura sum mamawh sorkarin a neih theih loh phah thin a. Chung chhiah awlrutute chuan an sum chu market-ah an tihchet ve reng avangin ram in a tuar bawk a; chubakah ruihhlo hmanga sumdawng te, hel chi hrang hrang te sum (black money) tam tak hmanga an puih theih thin avang leh pawisa lem thlenga an vawrhdarh avangin ram economy-in nasa takin a tuar a. Chu’ng thil duhawm lote tihtawp a nih theih nan he hmalakna lian tham tak hi India Sorkar chuan a kalpui ta rup mai a ni.

He thil hi ram leh ram mipuiten kan thatpui zawk tur a ni tih hre thar leh i la, tuna kan tuar hi nakin lawka hmasawnna hna chak zawka a kal theihna tur a nih avangin mipuite chi-ai lo tur leh lo dawh hram hram turin kan ngenin kan inhriattir nawn leh a ni e. Eiruk pawisa emaw pawisa dik lo (counterfeit) emaw, thuhruk ngai pawisa emaw lo nei teuh erawh chuan an buai phah ngei ang.