Vawiin tlai hian Serchhip District Bawrhsap Dr. Lalrozama chuan Serchhip a Bank hrang hrang hotute chu Rs 500 leh Rs 1000 note hlui, sawrkar laipuiin a hnuhkir chungchanga Serchhip District dinhmun a sawi pui a. Sawrkar laipui vekin nitina pawisa lakchhuah theih zat a bituk avangin vawiin thengin District chhungah pawisa thleng leh lakchhuah chungchangah harsatna a la awm lo tih Bank Manager te chuan Bawrhsap hi an hrilh.

Mizoram Finance Commissioner, L N Tochhawng chuan, Rs 500 leh Rs 1000 hnuhkir (demonetization) avanga Mizorama District zawng zawngte nitin dinhmun report tura thupek a chhuah angin, vawiin hian Serchhip District chhunga mipuite dinhmun thlir hona neih a ni a. He hunah hian Dr. Lalrozama, IAS chuan, Serchhip District mipuite tan chiaina tur emaw buaina tur a awm rihloh thu sawiin, tun dinhmunah Bank chimbuai khawp pawisa thleng tum emaw deposit tum emaw an awm loh thu a tarlang a. Pawisa thleng duhte chuan, danin a phut anga Document (Adhaar Card emaw, ID Card emaw, Ration Card emaw Driving License emaw) te kenga, form fill-up tur awmsa fill-up a biktuk zat thleng mai theih a nih thu a sawi. Document an kenglo palh a nih pawhin Account nei sate tan chuan mahni Account ah Deposit maia, withdraw dan pangaia withdraw theih a ni, a ti bawk. Tin, hun reiloteah Serchhip a mi tur note thar pawh a lo thlen thuai beisei a nih thu Bawrhsap hian a sawi tel bawk. Hetihlai hian Bank Manager te chu, venhimna lama mamawh an neih chuan tanpui nghal turin a inring reng tih Dr. Lalrozama hian a hrilh bawk a ni.

Vawiina Bank Manager te leh Bawrhsap inkawm honaah hian thingtlang lama Bank te dinhmun pawh sawi a ni a, an ni lam pawh tun thleng chuan harsatna em em an neih loh thu leh engkim a kaltluan rih thu dawn a ni.

Mizoram Finance Commissioner thuchhuak angin District tinte dinhmun hi nitin zirchian a report thehluh zel tur a ni ang.