Vawiin khan a tum khatna atan Art & Culture buatsaihin Zo Khua (Cultural centre), Falkawn-ah Pawl Kut hman a ni a. Art & Culture Minister Pu P.C.Zoram Sangliana chu Kut Pa niin Kut hawnna inkhawm a hmanpui a ni.

 

 

Art & Culture Jt. Director Pu Ngurbiaka kaihhruai he hawnna inkhawmah hian Minister chuan thu sawiin hnamze tha tak tak pawh nei mahila, zalenna leh muanna boruak hnuaiah lo chuan a hlutna a bo thin a, hetiang ang hun tha hi a buatsaih theih loh thin a ni. Vawiina Mizoram Chief Minister Lal Thanhawla lalthuthleng kenna avanga Mizoramin remna leh muanna a neih leh takah chuan Mizo hnam zia chu khawvel hriatin phochhuah a ni mek ta a ni, a ti. Sorkar laipuiin Museum changtlung tak sak nan cheng vaibelchhe 6 a pek tur thu tarlangin Minister chuan district tina library emaw culture hawi zawnga thil engemaw ber sak nan sorkar laipui chuan cheng nuai 15 theuh a pek tur thu pawh a puang a ni. Mizo thangthar zel tena Mizo hnam incheina, zai, lam leh ze dang hrang hrang an chhawm nun reng a pawimawh em em a. Kum 2010-a India-in Commonwealth Games an thlenna tura hawnna emaw kharna inkhawm-ah pawh Mizo Cheraw lam entir ngei a nih theih nan tan lak mek a ni, a ti bawk. He hunah hian Khuallian hi a thiannu Pi Lalthlamuani leh Art & Culture Secretary Pi B. Sairengpui bakah officials engemawzatin an tawiawm a ni.

Art & Culture Director Pi Boichhingpuii pawhin thuhmahruai sawiin Mizo hnamin naupang puala intihhlimna ni a an neih chhun Pawl Kut chu kum dangah tih ngai loh a ni a; kuminah North East Zone Cultural Centre (NEZCC), Dimapur leh Mizoram sorkara Art & Culture Department tangkawpin he Kut hi hman tan a ni ta a ni, a ti. Sorkar emaw mimal ang pawhin naupangte tana hun bik huaihawt a khat a, Pawl Kut hi a zawngchhang tlak viau nia a hriat thu leh kum dangah pawh tih chhunzawm zel a beisei thu a sawi.

Vawiina hman tak Pawl Kut-ah hian heng zirna in leh pawl atangin naupang leh zirlai an tel thahnem hle a ni : TNT, Zuangtui; S.S. Memorial School, Bungkawn; Falkawn P/S & M/S leh P.C. Girls School. Anni bakah hian M.C.O, Bungkawn & Falkawn leh Lamthiam thlankhawm ten Mizo hnam lam leh zai engemawzat an entir bawk a ni.