Chief Minister chuan Insurance Company Assessor (surveyor/investigator) Silchar atanga tirh ngai thin hi tihbo a duh thu a sawi. He thu hi vawiin Aijal Club a ‘National Seminar on Motor and Life Insurance’ tih thupui hmanga Mizoram Consumers Union (MCU) leh Insurance Regulatory and Development Authority (IRDA), Hyderabad te tangkawp ina an buatsaiha a sawi a ni.

Chief Minister chuan ram thang zelah insurance pawimawhna te a zual zel a, Mizoram ngeiah pawh rawn inbun tawhin, duhthu erawh a sam teh chiam lo a ni a ti a. Ram changkangah chuan insurance company te hi mipuiin an hmang tangkai hle a ni a ti a. Insurance Company te hi district tinah awm tur an ni a, chumi bawhzui chuan Union Finance Minister hnenah pawh thlen a nih tawh thu a sawi.

Insurance hi kan uar chhoha hman tangkai thiam a pawimawh a ni tiin, Chief Minister chuan thil chi hrang hrang in leh lo, dawr, motor leh lirthei dang, kan nunna, hriselna leh zin veivah te insure theih a nih thu a sawi a. Harsatna kan neihte chu kan ran vulhte insure na kan neih loh thu leh hriselna lama insurance company la awm ve lo te a ni a ti a. Hei vang hian state dangte aiin kan la hnufum a ni a ti. Chief Minister chuan chhiat tawk thut thei vek kan ni a, chuvangin ‘risk’ lak reng ai chuan lo in insure zel hi a him ber a ni a ti.

Chief Minister chuan Consumers Union thothang tha tak kan nei a lawmawm hle a ni tiin, isurance lam harsatna kan neihah te pawh chak taka hma an lak theih a beisei thu a sawi a. Sorkar pawhin an mamawh siam sak a tul tihte a hria a ni a ti. Corruption chungchangah Pu Hawla chuan sumdawngte zingah pawh corruption hi awmlo a ni lova, company an dawrte atangin an hlep tur commission a awmsa vek laiin, chumi piah lama toin an bungrua an hralh a, hei hi corruption ve tho a ni a ti a. Consumers Union hi an viak a that phawt chuan mipuite thlavang huahin min chhan thei a ni a ti. Hun lokal zel turah pawnlam mi ten ram leilung fate an hnuaia an dah lohna turin Consumer Union hian hma a la thei bawk a ni a ti.

Sorkar hnathawk diklo taka thil ti te chu dikna a lal theih nan case te siam sak an nih thu Chief Minister chuan sawiin, hreh tak chungin a then chu ban an ni a, a then suspend, thenkhat compulsory pension tirte an ni a ti a. Hrema, jaila tan tir chu judiciary lam hna a ni a ti. Hlawha lungawilo te chungchang a sawiah, Chief Minister chuan hlawha level khata awm thin te level pui reng a theih lohna a awm thei tiin, hmana hna pawimawh thin kha tunah chuan a pawimawh tawhlo thei a, chutiang bawkin hmana pawimawhlo kha tunah a pawimawh ve thung thei a ni a ti . Khawvel inher danglam zelah hetiang hna pawimawhna inthlakthleng hi tam tak a awm a ni a ti.

Seminar hawnna inkhawm hi Pu Laldingliana Sailo, Secretary, i/c Publicity, MCU in a kaihruai a. Hyderabad atanga lokal, Pi Yegnapriya Bharath, Jt Director, IRDA in thuhma sawiin, IRDA hi Insurance policy holders (neitu) vengtu a ni a ti.

Seminarah hian mithiam, resource persons Pi Sudha Ramanujam, Dy Director, IRDA te,Dr.L.G. Sigh, Associate Professor te leh Pu S.Hansda, Divisional Manager, LICI, Silchar te an rawn tel bawk a. Seminar hi hun hnihah thenin motor insurance chungchangah claim leh lungawi lohna thu te, Surveyors leh Investigator hnathawh dante leh Mizorama Insurance chungchang te sawiho a ni.