Khawvel huap a vaihlo chungchanga survey neih Global Adult Tobacco Survey (GATS) 2009 – 2010 in Mizoram dinhmun a tarlanna ‘Fact Sheet’ theh darna hun chu vawiin khan Mizoram State Tobacco Control Society (MSTCS) chuan I & PR Conference Hall-ah an buatsaih a, Pi Esther Lalruatkimi, Secretary, Health & Family Welfare Department leh Chairman MSTCS Chairman ni bawk in a hmanpui a ni.
Pi Esther Lalruatkimi chuan Survey in Mizoram dinhmun a tarlan chu a zahtlak a, zuk leh hmuam a kan san zia a rawn nem nget a ni a ti. Survey-a tarlan statistics chu dik leh rintlak ni a, a pawimawh zia kan hriatthiam a, vaihlo do kawnga kan hnathawh, hma kan lak dan leh hmathar lak zelna tura ruahhman siam leh duan kawnga nasa takin in min tanpui thei a ni a ti a. Vaihlo do kawnga kan za vaia kan tan hoa, beihpui kan thlak chuan hlawhtlinna sang zawk leh awmze nei zawk a awm thei thu a sawi bawk a ni.
He hunah hian Dr. Jane Ralte, State Nodal Officer cum Project Officer, MSTCS chuan MSTCS in vaihlo(zuk leh hmuam chi) do kawnga an hnathawh leh hma an lak dan te a tarlang a. Sawkar Laipui-a Ministry of Health & Family Welfare hnuaia Chief Medical Officer (Tobacco Control) Dr. L. Swasticharan chuan GATS Report-a Mizoram a vaihlo (zuk leh hmuam chi) hman dan statistics chu huam zau takin a tarlang a, National Tobacco Control Programme (NTCP) hnuaia hnathawh dan leh he programme thuam chak mek a nih dan a sawi tel bawk a ni.
GATS 2009 – 2010 in a tarlan dan chuan Mizoram a vaihlo (zuk leh hmuam chi) hmang thin chu – Ei/hmuam chi Mipa – 72.5 %, Hmeichhia – 61.6 % leh Zuk chi Mipa – 59.4 %, Hmeichhia – 19 % a ni a. Vaihlo hman dan India ram pum dinhmun chu - Ei/hmuam chi Mipa – 47.9 %, Hmeichhia – 20.3 % leh Zuk chi Mipa – 24.3 %, Hmeichhia – 2.9 % a ni ve thung a ni.
GATS hi khawvel a vaihlo hman hluarna ram 15 ah World Health Organization (WHO) leh Center for Disease Control, Atlanta tanpuina in neih a ni a. India a pawh he Survey hi Ministry of Health & Family Welfare in khaikhawmin International Institute of Population Sciences (IIPS), Mumbai in an buaipui a. India a sample size chu mi 70,000 niin Mizoram-ah chuan mi 1573 an ni a, hetah tang hian za zela 98.8 in survey zawhna chu an chang a ni.
Vawiin programme ah hian tlawmngai pawl hrang hrang – MJA, MHIP, MZP, ISTHM (Mizoram Chapter) aiawh mi thahnem tak, Health Services Director Dr. Ramfangzauva leh a thawpui te leh Aizawl District Anti Tobacco Squad Member thahnem tak an tel a ni.
