Vawiin khan Kolasib District Aids Prevention and Control Committee chu an chairman Pi Niharika Rai, IAS, Dy. Commissioner hovin DC Conference Hall-ah an thukhawm a. He hunah hian District chhunga AIDS awareness neih tawh dan leh hnathawhte thlir let a ni a. Aids awareness programme chi khat atana duan District Inter Village Red Ribbon Football Tournament 2012-2013 neih dan tur an relho bawk a ni.

Pi Niharika Rai, Chairman chuan DAPCC chu District chhunga AIDS chungchang zirtirna leh inhrilhhriatna kawngah a thawh hlawk hlea a hriat thu sawiin member te chu an thiamna te thawkkhawma thurawn inpe tawn fo turin a chah a. Uar lehzuala hei hi kalpui a, Home hrang hrangah te zirtirna beihpui thlak a, a tul ang zela thalai zawkte pawh fimkhur tura thurawn pe turin YMA tepawh hman tangkai nise a ti a ni.

Dr. Lalhlimpuia, Member Secy & District AIDS Control Officer chuan report pein tun dinhmunah Kolasib District chhungah HIV positive mi 324 hmuhchhuah tawh an nih thu leh chung zinga 172 chu mipa, 152 chu hmeichhia an nih thu a sawi. Kum 2002 June atanga August 2012 thlenga thisen test tawh zat chu 25084 an tling tih a sawi bawk. HIV Aids avanga nunna chan 23 awm tawhin chung zinga 2 chu naupang an ni. Meeting hmasain alo rel tawh bawhzuiin HIV/AIDS vantlang hnena zirtirna atan Thingdawl leh Bilkhawthlir RD Block ahte Bharat Nirman Volunteers hman tangkai anlo ni tawh bawk a ni.

District Inter Village Red Ribbon Football Tournament neih dan tur rel nghalin hei hi nakkum January or February thlaa neih tura rel a ni a. Multi Media Campaign on HIV/AIDS Sub Committee Secretary Pu R. Lalhmingthanga chuan report pe in Football tournament buatsaih nana sum ruahman Rs 2,11,000/- a pharh a. Rs 1,50,000/- chu MSACS atanga hmuh tur a ni a. Zau taka sawi ho hnuah sum Estimate hi Rs 2,05,000/ ah tih thlak a ni a, MSACS atanga sum hmuh bak hi chu Committee-in hmuh belh dan a ngaihtuah dawn a ni.