Vawiin khan Lunglei Circle hnuaiah Power & Electricity hnathawkte chu I&PR Conference hall, Lunglei-ah ‘Energy Audit & Accounting’ chungchang training an nei a; Lunglei Division bakah Saiha, lawngtlai leh Chawngte atangin P&E hnathawkte he training-ah hian an tel a ni. Energy Accounting Training neihpui tur hian Aizawl atangin Chief Engineer, P&E Er.R.Vanlalhruaia, SE Er.H.Zoliana, EE Er.Vanlalauza Colney, AE Er.Thangluaia leh AE Er.Lalremtluanga te an lo kal a; anni bakah hian SE(Lunglei Circle) Er.R.Lalrema, EE Er.W.C.Lalchhuanliana leh Saiha EE Er.R.Lalchhanhima te pawh an tel a ni.

P&E Chief Engineer Er.R.Vanlalhruaia chuan Lunglei Circle huamchhunga hnathawkte taimakna leh thawhrimna fakin he Circle atang hian P&E Department-ah pawh hian sum (revenue) a lut hnem ber a ni, a ti a. Amaherawhchu kawlphetha lutzat leh hralhchhuahzat a la inmil lo fo thin avangin energy audit & accounting uluk zawka tih a ngaih thu a sawi a, he training-in a tum ber pawh a ni, a ti. Restructured Accelerated Power Development Reform Programme (RAPDRP) hnuaiah Mizoram P&E tichangtlun nan Cheng vaibelchhe 57 pek tur a nih thu a sawi bawk a ni.