Nimin khan Power & Electricity Secretary Pu Rajiv Kumar Gupta leh Engineer-in-Chief Pu Lalnghinglova Pachuau hovin P&E leh ZEDA hotute chuan 132kV Sub-station & Mini Hydel project, Khawiva bakah Kawmzawl-a bun mek 33kV Sub-station leh Pukpui-a 5kW Wind Solar Hybrid Sytem hmunte an tlawh.

Mizoram chhimlam zawng zawng kawlphetha pekchhuahna hmun 132kV Sub-Station, Khawiva hi November ni 4, 1994 khan commissioned a ni a, heta tang hian Chawnhnu Sub-station, Lungsen Sub-station, Theiriat Sub-station, Lunglei Sub-station leh PHE tuikhawlna/pekchhuahna hmun hrang hrangah kawlphetha thawnchhuah a ni ve thung a ni. Khawiva hmunah hian Mini Hydel Project (3x350kW) khuar a ni bawk a;  hei hi December ni 8, 1988 khan commissioned a ni tawh a, 8.5MU a pechhuak ve thei a ni. Chhimlamah kawlphetha duhkhawplohna a sang zel avangin sorkarin rem a tih angin tun hnai khan Kawmzawl hmunah 33kV Sub-station bun mek a ni bawk a, commissioned thuai thei turin hna chak taka kalpui a nih mek thu P&E hotute chuan an sawi. 

ZEDA leh P&E tangkawpin Mizoram hmun hrang hrangah wind/solar energy project enegemawzat kalpui mek a ni a, chumi zinga mi pakhat 5kW Wind Solar Hybrid Sytem, Pukpui chu nimin khan officials-te hian an tlawh nghal a. He project hmang hian zirna sikul leh street light engemawzat tihen a ni a, hlawhtling taka kalpui mek a nih chu lawmawm an tih thu officials ten an sawi bawk. Nimin khan Lunglei-ah Wind/Solar energy project tan theihna tur hmun dangte pawh enfiah a ni nghal bawk a ni.