District huapa Chapchar Kut 2016 lawmna atana din Chapchar Kut Celebration 2016 Organizing Committee chu nimin khan Kolasib DC Conference Hall-ah an thukhawm. He meeting-ah hian Kolasib DC Pu H. Lalengmawia, Kolasib SP Pu C. Lalzahngoa, Working Committee Chairman Pi Maria CT Zuali, Director SIRD leh Member dangte chu kim taka telin ropui, phuisui leh Mizo zemawi leh nunzia a tha thei ang ber phochhuah leh lantir anih theih nan theitawp chhuaha ruahmanna leh programme siamte an rel a. He ni hi District mipui, a tam thei ang ber a huap theih nan leh ruahmanna siamte puibawm a, a tha thei ang ber leh phuisui taka he ni hi hman anih theih nan Kolasib DC leh Kolasib SP te chuan an thla khat hlawh an thawh tur thu an sawi

Kolasib DC Pu H Lalengmawia chuan Kolasib-ah Chapchar Kut hi a ropui thei ang ber leh a Mizo thei ang berin hman leh lawm kan tum a, programme kan siam te hi intihlimna lam hawite awm mahse kan tum ber chu thangthar leh thalaiteah Mizo zia leh hnam ziarang an hriat leh zawk nan hetiang lam entir leh pholan a ni a. Hlawhtling leh ropui taka he ni hi kan hman theih nan District mipui kan pawimawh a, ruahmanna kan siamah te theitawpa in mi phurpuina leh in mi tawiawmna kan mamawh a ni, a ti. Kolasib SP Pu C. Lalzahngoa pawhin hlawhtling taka Chapchar Kut hman anih theih nana Department hrang hrangte leh Kolasib a tlawmngai pawlte thawhhona, inpekna leh hmalakna te chu ropui a tih thu a sawi.

Chapchar Kut 2016 hi Kolasib Tumpui Field ah hman a ni dawn a, Kut Pa turah Horticulture Minister Pu P.C. Lalthanliana chu beisei a ni a. Cachar, Hailakandi leh Karimganj Districta DC, SP leh DFO te, CIJW School Vairengte a sipai hotulu te bakah NEEPCO, Railways, ONGC leh PSU dangte aiawh leh The Telegraph leh National media lam thawk midangte sawm tum a ni a. Kum danga tih ngai loh thil tam tak pholan leh tih tum anih vangin Chapchar Kut lawmna atan Sawkar atanga cheng nuai khat hmuh belh anih theih nan Department, mimal leh PSU ten thawhlawm an thawh a, he thawhlawm tling khawm ni nimin thleng khan cheng 1,66,500 a tling tawh a ni. Miss Chapchar Kut 2016 leh Best Traditional Dress(naupang kum 12 hnuai lam tan) thlanna neih a ni dawn a. Chapchar Kut 2016 pual hian ZOOM Kolasib leh MJA Sub Headquarters, Kolasib te chuan Photo Exhibition an buatsaih dawn a ni.

Chapchar Kut sound system hmanna tur senso hi P&E Kolasib Division, Senior EE Pu R. Romawia’n a tum tur thu sawi a. Power lamah harsatna awm palh sut kian nan CMO Kolasib chuan an Generator lian a hmunah hian an hun tur thu an sawi bawk.

Ei leh in lamah pawh Mizo ei leh in ang chi, kawlbahra, bal, vaimim leh thil dangte buatsaih tum a nih thu meeting-ah hian tarlan a ni bawk.

Attachment

  • Loading attachment...