Vawiin khan Pu R. Lalzirliana, P&E Minister chuan Buarpui khuaah 33KV Sub Station a hawng a, Bialtu MLA Pu Chalrosanga leh Aizawl South I Bialtu Pu Vanlalvena bakah P&E Department hotu ten he hun hi an hmanpui a ni.

Khuallian Pu R.Lalzirliana chuan Zoram sawrkar hian tun hnaiah Power & Electricity lamah hma a sawn nasa hle a ni tia hmasawnna hrang hrang te sawi langin P&E Department hi Department lian tak anih avangin thawktute chu hlemhletna leh eirukna hrang hrang laka fihlim tura a duh thu leh Electric hi mitinte mamawh anih avangin mipuite leh mahni ram leh hnam hmasawnna tur an chanpual lo it a, lo eiru lo hram turin thawktute pawh a ngen a ni.

Hre reng chunga eiru ngam chu Politician emaw, sawrkar hnathawk pawh nise an tla ngam tur a ni tih te pawh hi mi ngaihdan a ni tawh a, mite hriat reng tlak tur mel lung kan phun em tih te hi ngaihpawimawh atan a tha tiin P&E Minister chuan sawrkar lamah eng pe chhuak turin Vankal, Lungpher leh Sihhmui ah te hian ni zung chakna hmanga hmasawnna bun chhoh mek a ni a, a hlawhtlin chuan khaw dangah pawh siam zel a ni ang a ti.

Khualzahawm Pu Chalrosanga, Bialtu MLA chuan Buarpui khuain hmasawnna hrang hrang tun hnaiah a neihte sawi chhuakin P&E Minister Pu R.Lalzirliana’n kawng engkimah an mamawhte hriatpui a Buarpui khaw hmasawnna kawnga a puihnaah lawmthu a sawi a. Vawiinah hian Buarpui khua leh a chhehvel tana tangkai em em tur Buarpui 33KV Sub Station hawn theih a hma latu hrang hrang, Minister, Department leh khawtlang te hnenah lawmthu a sawi bawk.

Aizawl South I Bialtu Pu Vanlalvena pawhin thu sawiin tunhnai a din Buarpui Higher Secondary School in result tha tak an neihah lawmpuina hlan in lawmthu a hrilh a, hmasawnna chhiar thiam turin a fuih a, thangtharte chuan electric pawimawhna an hriat chhoh zel a tul thu leh hmasawnnaah lawm thiam turin a chah bawk a ni.

He hunah hian Minister chuan khawtlangin an khaw tana an lo dil Street Light 10 (sawm) chu Bialtu MLA nen sawi dunin pek ngei an tum thu an sawi a. Vaibelchhe li senga tui pump chhoh dan tur pawh ngaihtuahpui nghal a tum thu a sawi. 33KV Sub Station hriatreng nan Pu R.Lalzirliana hian thing a phun nghal bawk a ni.

Buarpui Sub Station ah hian transformer lian power transformer bun a ni a. Hei hian Buarpui leh a chhehvel khuate chu kum tam tak chhung electric a pe thei dawn a ni. Transformer lian atang chuan Control Room chhunga control pannel kaltlangin khaw hrang hrang pekna 11KV Line pathum siam a ni a, chung te chu -

1. Buarpui khaw chhung pekna

2. Dengsur, New Khawlek leh South Khawlek pekna

3. West Bungtlang leh Kawlhawk pekna te an ni.

Buarpui Sub Station ah hian khawl chi hrang hrang pawimawh tak tak bun a ni a, chungte chu

1. 2.5 MVA,33/11KV Power Transformer - 1 No.

2. 33KV Control & Relay Pannel - 3 Nos.

3. 100KVA 33/0.4 KV Station Transformer - 1 No

4. 33KV Cuircuit Breaker - 3 sets

5. 33 KV Isolator - 8 sets

6. 33KV Lightning Arrester - 12 Nos.

7. 33KV Current Transformer - 9 Nos.

8. 33KV Potential Transformer - 1 No

9. 11KV Control & relay Pannel - 5 Nos.

10. 63KVA Distn. Transformer - 1 No.

Heng bakah hian hna pawimawh dang hengte hi thawh tel an ni bawk.

1. Control Room Building - 1 no.

2. 11 KV link line - 3 Kms

3. L.T Link 3-phase, 5-Wire - 0.9 Km

4. Approach Road - 0.5 Km

5. Staff Quarters - 2 Nos

6. Godown - 1 No.

Buarpui a 33KV Sub Station siam a nih hma kha chuan Buarpui leh a chhehvel khuate hi Thenhlum Sub Station atangin 11KV Line sei tak hmangin Electric pek an ni thin a, a kal kawng a thui tham em avangin Electric Supply a regular tawk lo fo thin a, a voltage pawh a hniam a, duhthu a sam lo em em thin a ni.