3217/2023-2024

Dated Lamzawl the 4th January 2024 : Vawiin Chawhma khan Minister of State Pu F. Rodingliana, P&E Minister chuan a bial chhunga Lamzawl Khua Haw Runpui programme ah Khuallian niin hun a hmanpui.

Bialtu MLA leh Minister ni bawk Pu F Rodingliana chuan Party rilru dahtha a kalphung thar nena hmalak a tul thu a sawi a. Eng chhit man kum tina pung thin pung tawhlo tur ringawt pawh mipui te tana malsawmna a nih tawh thu sawiin, a malsawmna zarzo zel turin mipuite pawh tan lak zel a tul thu a hrilh bawk.

Sawrkar thar chuan policy tihlawhtling turin mipuite tawiawmna leh tawngtaipuina an mammawh thu sawiin, tawngtai pui thin turin a sawm a. Lamzawl mipuite danglamna chu an hnathawhah lang se tih chu a duhthusam leh a beisei ber a nih thu a sawi bawk.

Pu F Rodingliana chuan ram siam that nan hian lo nghet neih a tul thu te leh Lamzawl khua pawh dawnfawh leh thlai dang tam zawk thar thei tura tan kan lak a tul thute sawiin, ram leilung hlawk zawk leh hahdam zawka eizawn nana hman a nih theih nan, Sorkar hmalakna lo tawiawm zel turin a sawm a, Lamzawl khua chu zirna leh eizawnna lamah Zoram hmelhriat an lo nih tawhna chhawm nung zel turin duhsakna a hlan nghal bawk a ni.

He hunah hian Pu H. Lalramliana SDO(C)&BDO, Ngopa chu Khual zahawm niin Lamzawl khua in haw runpui hun an hmang thei chu a lawmpui thu sawiin, khaw entawntlak leh intodelh leh inlungrual tak an nihna chhawm nung zel turin a duh thu a sawi bawk a ni.

He hun hi Pu Lalbiakzaua VCP in kaihruaiin Upa R. Lalremruata'n hunserh a hmang a. Haw Runpui Programme ah hian mipui zaihona neih a nih bakah zaithiam hrang hrang te'n mipuite zaiin an awi a, kum 70 chunglam chawimawina thilpek hlan an ni bawk.

Minister hi A nupui leh Pu Duhsanga,SE(P&E) Champhai, PC Lalvuana, Joint Director(HTH)C&I, Pu Lalrozama SDO Ngopa(Pwd) leh  party aiawh thenkhatten an tawiawm bawk a ni.