3216/2023-2024

2023 Pawlkut thla ni 4: Mizoram Legislative Assembly Deputy Speaker, Kolasib Bialtu MLA ni bawk Pu Lalfamkima chuan vawiin chawhma dar 11 khan Kolasib DC Conference Hall-ah Kolasib District chhunga Head of Office-te kawmin, ram tana hma lak an tumnaah ṭhahnem ngai taka thawhpui turin a sawm.

Pu Lalfamkima chuan Kolasib-a sawrkar official-te chu kum thar chibai bukin, kalphung thar, mipui sawrkar kalpui a ni tawh dawn tih a sawi a.  Sawrkar tharah chuan kut hna thawktute chawi kan a, ram intodelh chu an thupui a nih thu leh an ngaih pawimawh tur thu a sawi a. Kolasib District chu kut hna thawktute tan potential area a nih thu sawiin, thlai thar, buh leh balah ram kan intodelh theih nan theih tawp chhuah a, potential area a nih ang taka hman ṭangkai a ṭul thu a sawi a. He'ngah hian Kolasib District chhunga department hrang hrangte thawh hona ṭha neih a pawimawh thu sawiin, department hrang hrang hma lakna inthuah leh insu deuh a lo awm a nih pawhin ṭha taka sawi ho va, thawh ho dan zawn a ṭhat thu a sawi.

Deputy Speaker chuan Kolasib District chu ramri hrul, border area-a awm a nih avangin dan leh thupek kenkawh kawngah fimkhur lehzual a ṭul thu sawiin, ramri chu sensitive area a nih avangin inthlahdah a rem loh thu a sawi a. Mizoram sawrkar chuan ramri a ngaih pawimawh thu sawiin, party hrang hrang leh NGO-te telna Boundary Committee pawh din a nih dawn thu a sawi.

Kolasib Bialtu MLA chuan Deputy Speaker mawhphurhna chu ṭha taka hlen chhuah a tum thu leh Kolasib District hmasawnna atan theih tawp a chhuah tur thu a sawi a. Kolasib District chhunga sawrkar official-te chu thurawn pe a, amah finchhuah ṭhin tura ngenin, harsatna an neihte pawh a hnena thlen hreh lo turin a chah a, a theih ang anga a bawhzui zel tur thu a sawi a ni.

Deputy Speaker chuan Mizoram mutan lian ber chu eirukna (corruption) a nih thu sawiin, corruption lakah sawrkar a khauh dawn tih a sawi a. An hma lakna hrang hrangah ṭha taka thawhpui turin sawrkar hna thawkte chu a sawm nghal a ni.

Kolasib District Deputy Commissioner (Bawrhsap) Pu John LT Sanga chuan he meeting hi a kaihruai a. Assembly Deputy Speaker-in Head of Office-te inhmelhriatna neih paha inkawm hona hun a buatsaih chu lawmawm a tih thu sawiin, sawrkar thar ruahmanna leh hma laknate ṭha taka kalpui chu sawrkar hna thawkte'n an tih tur a nih thu a sawi.

Kolasib District Senior Superintendent of Police Pu Lalrinawma Traite chuan ramria muanna a awm theih nana hma an lak dan report pein, tun dinhmunah harsatna an tawk rih lo tih a sawi a. Department hrang hrang hotute pawhin he hunah hian an hma lakna report pein, harsatna an neih leh an mamawhte an tar lang bawk.