1557/2022-2023
Champhai, the 11th August, 2022: Cheng nuai 7340 senga 2.5 Megawatt (MW) khawl pahnih tangkawp hmanga power 5 MW thleng siam chhuah theihna tur, Champhai District Khawbung RD Block huamchhung Khuangthing leh Thekpui inrina a awm, Tlawva Small Hydel Project (SHP) chu tukin dar 7:30 khan Power & Electricity (P&E) Minister Pu R.Lalzirliana chuan khawl tihnunna hmetnungin a hawng a, 33 kV Sub-station Khawbung nen thlunzawma eng pek chhuah nghal a ni. Hemi hnu hian Khawbung Community Hall-ah hawnna pual khuallian Pu R.Lalzirliana hova hman a ni a, Minister tawiawmtu East Tuipui bialtu MLA Pu Ramthanmawia, Bamboo Link Road Board Vice Chairman chu khualzahawm a ni a, Pu TC Pachhunga, Ex-MLA, Sports, Youths and Tourism Board Vice Chairman pawhin he hun hi Minister tawiawmin a telpui bawk.

Khuallian Pu R.Lalzirliana chuan thu leh hlaa miril, zonun zemawi vawngnung thintu Tuipuiral tlang dung huam chhungah tui atanga eng siam chhuahna, Tlawva Small Hydel Project hawn a ni ta chu lawmawm a tih thu sawiin, 2.5 Megawatt pahnih tangkawp hmanga Megawatt 5 thleng siam chhuak thei tura duan chu tui tam dan azir ang zela power pe chhuak tur a ni, a ti a. Tui chakna ringawt hmangin kum tluanin power full capacity-a a siam theih loh avangin thal laia tui khuapna siam tura ruahmanna neih a nih thu a sawi a. P&E Minister chuan power intodelh thei tura Sawrkar hmalaknate tarlangin, 4 MW Kawlbem Small Hydel Project peihfela hawn thuai beisei a nih thu sawiin, Vankal Solar Project 20 MW pe chhuak thei tur pawh zawhfel thuai beisei a ni, a ti a. Heng bakah hian Keifangah 10 MW Solar project, 24 MW Tuirini Small Hydel Project, 24 MW Tuivawl Small Hydel Project, 460 MW Chhimtuipui Hydro Electric Project (HEP), 76 MW Mat Sekawi Hydro Electric Project leh 3 MW Saiphal Small Hydel Project te thawk tura hmalak a nih thu a sawi a. East Lungdar to Khawbung 33 kV line zawm turin central electrical board-ah dilna thlen a nih thu leh 132 kV line Sub-station,12.5 KVA transformer Thingsulthliahah bun tum a nih thu a tarlang bawk.

Khualzahawm East Tuipui bialtu MLA, Pu Ramthanmawia, Bamboo Link Road Board Vice Chairman chuan Tlawva Small Hydel Project hawn ni chu bial tana hun hlimawm leh hriatreng tlak a nih thu sawiin, a hlawhtlinna tura a bul atanga tawp thlenga sawrkarna fawng chelhtu hrang hrang, Official-te leh tha thawhtu hrang hrangte hmalakna fakawm a tih thu sawiin, bial aiawhin lawmthu a sawi a. Bial chhunga power siam chhuahna hawn thar chuan power intodelhna a siam ngei a beisei thu sawiin, thal lai pawha power pe chhuak thei tur siam thei turin ngaihtuahna sen tel a ni, a ti a. Bial chhunga hmasawnna hrang hrang siamte tarlangin, kawngpui tha leh Dungtlang Police Station siam a ni te chu lawmawm tiin, hmalak tawhna leh hmachhawpte a tarlang bawk a. Tlawva Small Hydel Project hawn tak chuan bial chhungah hmasawnna a thlen ngei a beisei thu sawiin, mahni ta anga neitu thinlung pu chunga enkawl turin mipuite a chah bawk.

Thusawitu dang Sports, Youths and Tourism Board Vice Chairman Pu TC Pachhunga, Ex MLA chuan Tlawva Small Hydel Project hawn fel a ni thei chu lawmawm a tih thu a sawi a. Sports infrastructure tihchangtlun kawnga Sawrkar hmalakna leh hmachhawpte a tarlang bawk.

He hun hi Pu H.Lalengmawia, IAS, Commissioner & Secretary, P&E Department chuan a kaihruai a. Er. C.Lalropianga, MES, Superintending Engineer, Project Circle-II, P&E in technical report a pe a. Er.Laldela Sailo, Chief Engineer (Civil), P&E Department-in lawmthu sawiin hun a khar a ni.

Tlawva Small Hydel Project hi suar tam tak chhawrdawh behchhana siam a ni a. Tlawva SHP ah hian tuikhuah hmun leh khawl (Turbine) awmna hmun insanhleihna hi 101.3m (feet 300) chuang zet a ni a. He project-ah hian 2500 KW (2.50 Megawatt) khawl pahnih avaiin 5000 KW (5.00 Megawatt) bun a ni a, heng khawlte hi ruahtui tlak pangngai hunah chuan kumtin May thla atanga October thla thleng 5 MW pe chhuak thei tura ngaih a ni a, November atanga February thlaah chuan chawhrualin 1 MW vel pe chhuak tura ngaih a ni a, March leh April ah chuan khawl mamawh ang tui a awm dawn loh avangin khawl hi off a ni ang a, servicing tih nana hman a ni ang. Kumkhat chhungin power 13.14 million unit siam chhuak tura ngaih a ni a, tluangtaka khawl a tlan chuan kum khatah cheng nuai 517.43 thawk chhuak thei tura chhut a ni. Kum 20 chhungin project thawhna man hi hmuh let (Break-even point) beisei a ni a. Power siam chhuah hian Champhai District chhung chu power-ah min chawm hnianghnar hle tura ngaih a ni.

Tlawva Small Hydel Project-a Diversion weir, Feeder channel, Desilting tank, power channel, forebay, penstock, power house, switchyard leh approach road/internal road maintenance-te hi contractor ten an thawk a, Tlawva SHP atanga eng pekchhuahna 33kV line leh department quarters-te hi P&E department thawh a ni thung.

Project hna thawk tur hian NORTECH Power Project Private Limited, Kolkata chu Turnkey-a thawk tura thlan niin, 23/3/2012 ah inremna ziah fel a ni a. A tira ruahman original estimate cheng nuai 5749.08 chu ennawn niin cheng nuai 7340 ah tihsan a ni a. National Bank for Agriculture and Rural Development (NABARD) atangin cheng nuai 5140.49, Ministry of New & Renewable Energy (MNRE) atangin cheng nuai 700 hmuh turah nuai 630 hmuh niin, final installment hi khawl hawn hnuah 10% pek chhuah leh tur niin, cheng nuai 70 la hmuh belh tur a la awm a, State Matching Share atangin cheng nuai 1499.52 hmuh a ni bawk. Vawiin thlengin cheng nuai 7270.01 hmuh tawh niin, cheng nuai 7115.57 hman tawh a ni a, dawn leh tur nen cheng nuai 224 vel hmalak chhunzawm zelna turin a awm a ni.

Tlawva Small Hydel Project-ah hian tui tling khawl loin Lui tui luang ang ang chu khawl khawh vir tira mamawh zat lak penna tur siam a ni a. Tui mamawh bak chu Lui tui lak penna atang hian a liam mai a ni. Lui tui chu tuikawng hmahruai, Feeder Channel hmanga luantirin bawhhlawh paihna Tanky, Desilting Tank-ah a lut phawt a. Chuta tangin tui thianghlim zawk chu tui dahkhawl lailawkna tuizem chi khat Forebay ah hruai luh a ni leh a, awihpangtlan (steep sloping ground) ah tui chu Pipe lian tak ft 5 hawlhtlang (Penstock) hmanga chak taka luantirin electric siamna khawl Turbine pahnih (Dynamo lianpui ang) khawh vir tirin electric siam chhuah a ni. Electric siamna khawl hi In lian tak (Power House) chhungah a control-na khawl (Control Panels) hrang hrang nen dahkhawm a ni a, tui hman tawh hnu hian Lui khuah chah mawng lam a fin leh mai a ni.

Tlawva Small Hydel Project Power House bulah hian Switchyard bun a ni a, heta tang hian power siamchhuah chu 33 kV Sub-station Khawbungah thawn chhoh a ni.