No.7498/2020-2021

Tukin khan Power & Electricity Department Minister Pu R.Lalzirliana chuan ramri lui, Zophai Bairabi a tlawh a, ramria buaina thleng avanga P&E Department-a thawktu hliam tuarte leh khawtual mi hliam tuar, Bairabi PHC a enkawl mek te chu a tlawh nghal bawk. Minister hi Er. Lalrinawma Deputy Speaker, Pu Lawmawma Tochhawng Vice Chairman Lunglei HPC, Pu Ramthanmawia, MLA, Dr K Pachhunga, MLA leh Er. H. Lalzirliana MLA te bakah Pu Vanlaltlana, CE, P&E Department, Kolasib district-a official dangte leh khawtlang hruaituten an tawiawm a ni.

Minister Pu R.Lalzirliana chuan Zophai IR post tlawhin duty-te fuihna thu a sawi a, min thlahtute ram lo sualchhuah sa venhim chu a ram neitu mawhphurna a nih rualin hemi kawnga pawimawh hmasa berte chu ramria duty mek Mizoram Police-te chu an nih thu a sawi a. An hna chu huaisen tak a kalpui thin turin leh ram leh hnam humhim hna a nih angin rinawm tak leh inpekna thinlung puchunga an hna thawk thin turin a chah. IR Post Zophai a thawktute mamawha hman tur cheng 10,000/- a hlan nghal bawk a ni. 

Ramri lui, Zophai pel a Assam lamin kawng an lo laih phei chu a hmunah kalin a endik a, ramri chei that chu Sawrkarin a ngaih pawimawh thu sawiin Electric ban phun pheina turin hmalak thuai tur a nih thu a sawi a. Ramri lui hnaih a duty post siam te leh kawng thawmthat hna thawh vat a tul thu a sawi bawk a ni. Assam lamin a ramri pel a kawng an laih hi ram pawn atanga dan lova Assam rama lut rua Mizoram hnaiha inkhuar tumte hmatheha mi thenkhat politics khelhna hmanrua ni a a lan thu leh hetiang hmalakna hi thleng nawn tawh lo se a duh thu Pu R.Lalzirliana chuan sawiin he hmalakna avanga buaina chhuak chu pawi a tih thu a sawi bawk a ni.

Minister Pu R.Lalzirliana chuan Zophai ramri bula buaina chhuak avanga hliam tuarte tlawhin, "Ram leh hnam tan a mi inpe, thian chhan thih ngam leh zo nun ze mawi tlawmngaihna tilanga thawkchhuak mi chhuanawm tak an ni," a ti.