836/2026-2027

Saitual, the 4th June, 2026: Vawiin khan Hliappui Auditorium-ah, Sawrkar laipui scheme PM-RKVY-DPR 2025-2026 hnuaia sapthei chin hawnna hun hman a ni a, Pu F. Rodingliana, Hon'ble Minister, Power & Electricity, Commerce & Industries, etc chu khuallian niin hun a hmanpui a, tanpuina te a sem chhuak nghal bawk a ni.

He hunah hian khuallian Minister Pu F. Rodingliana chuan thu a sawi a, Sawrkar laipui scheme tha tak hnuaia Hliappui leh Pawlrangah te sapthei chin kalpui a ni thei tur chu lawmawm a tih thu sawiin, Sawrkarin kuthnathawktute tan an thlai thar hralhna tur “market” a siam sak chu a vanneihthlak hle bawk a ni, a ti. Khuallian chuan kalkhawmte chu sawrkarin an banah a kaih dawn avangin thu mai mai tur an ni lo tih a sawi a, hma lam pana ke pen zel tura fuihin, department lama hotuten theih tawp an chhuah a, kan ram hmasawnna leh dinchhuahna chu kuthnathawktute kutah a innghat thui hle a ni, a ti bawk.  

Minister chuan a thlawna pawisa dawn rilru paih a hun tawh tih sawiin, tuna an pawisa dawn te chu a thlawn a ni lo tih hria a, an dinchhuahna tura Sawrkarina tanpuina sumfai a pek lawkna a ni tih hre thar leh turin kalkhawmte chu a chah a. Kan pawisa dawn te chu a hmanna tur loa kan hman chuan eirukna a ni tih sawiin, mahni pawimawhna zawn theuha theih tawp chhuah turin kalkhawmte chu a fuih a, a duhsakna a hlan nghal bawk a ni. 

Hliappuiah hian hamthatna dawngtu mi 51, Pawlrangah mi 39 an awm a, he scheme hian tanpuina sumfai bakah hmanrua leh damdawi hrang hrang te a keng tel dawn a ni.   

Vawiin inkhawm hi Pu C.H Lalmuanpuia, Director, Horticulture chuan a kai hruai a, Lt. Lalrammawia, Hliappui chuan hunserh a hmang a ni. Thusawi hi khuallian Minister Pu F. Rodingliana bakah Hliappui VC aiawh leh Pawlrang VC aiawh atang tein ngaihthlak a ni a, Pu Jacob Lalmalsawma, DHO chuan technical report a pe bawk a  ni. Pu Vanlalthara Colney, BHO, Ngopa Block chuan lawmthu sawiin hun a khar a ni.