2191/2026-2027

Saitual, the 11th September, 2026: Vawiin khan Argiculture leh Tourism department-te tangkawp huaihawtin Zaupui, Saichalah Lo Zawh Pui hman a ni a, Power & Electricity Minister Pu F. Rodingliana chu khuallian niin hun a hmanpui a, Tourism Minister Pu Lalnghinglova Hmar chu Lo Zawh thlengtu a ni bawk.

He hunah hian khuallian Pu F. Rodingliana chuan thu sawiin, Lo Zawh Pui an hmang thei chu lawmawm a tih thu a sawi a, a hlawhtlin theih nana tha leh zung sengtu zawng zawngte chu fakawm a tih thu a sawi. Khuallian chuan Sawrkarin kuthnathawktute dawm kan nan theih tawp a chhuah tih a sawi a, an thlai chin thenkhatte a lei sak bakah lo hal zawha thlai chin (shifting cultivation) aia hrisel leh ram ti chhe lo zawk ‘permanent farming’ kalpui tan mek a nih thu a sawi.

Pu F. Rodingliana chuan lo te chu khawl hmanga tihchangtlun zel an tum thu a sawi a, tui hna tha tak tak hman tangkai a nih theih nan leh ni zung chakna ‘solar power’ hman a nih theih nan hma lak an tum thu a sawi. Minister chuan lo neih chu Mizo nuna bet tlat a ni, a ti a, Saichal Lo Zawh Pui chu Mizo taka khualzin hipna tha tak a nih a beisei thu sawiin, hun hlimawm tak hmang turin kalkhawmte chu a duhsakna a hlan.

Lo Zawh thlengtu Pu Lalnghinglova Hmar pawhin thu sawiin khualzinte hip thei, Mizote Mizona chhawm nung zel thei tur Tourism Department chuan a ngaihtuah chhuak tih a sawi a, Lo Zawh Pui chu Agri-tourism leh Horti-tourism nena inkaihhnawih pawimawh tak a ni, a ti. Minister chuan Lo Zawh Pui chu Sawrkar thil tum pawimawh tak department hrang hrang thawhhona ‘convergence’ tihlawhtlingtu a ni tih a sawi a, Lo Zawh Pui chu Mizoram mipui ten Saichal khua an hmelhriatna tur a ni, a ti. Minister chuan Saichal mipuite chu hun hlimawm tak hmang turin a duhsakna a hlan nghal a ni. 

Vawiin hun hmanna hi Pu C. Lalremruata, Chairman, Lo Zawh Pui Organising Committee chuan a kaihruai a, Upa Lianngheta’n tanna hun a hmang. Thusawi hi khuallian Minister Pu F. Rodingliana, Lo Zawh thlengtu Minister Pu Lalnghinglova Hmar bakah Pi Ramdinliani, Secretary, Agriculture & Farmers Welfare Dept., Pu Zorammuana, VCP Saichal-te atangin ngaihthlak a ni. Minister hi Pu Sudhir Kumar, Principal Secretary, GAD, Pu Vivek Kumar Maurya, SP, Saitual, Pu Lallawmawma, Addl. DC, Saitual bakah Tourism department leh Agriculture department-a hotuten an tawiawm a ni.

Official programme zawhah hian Khuallian hoin hlo thlawhna hun hman a ni a, zaithiam te nen hun hlimawm tak hman chhunzawm a ni bawk.