No.2505/2021-2022
Aizawl 7th october 2021: Vawiin khan P&E Minister Pu R.Lalzirliana'n District Hospital Saitual-ah PMCARES hnuaia PSA Oxygen Plant hawnna hun a hmang.

Minister Pu R.Lalzirliana chuan Covid-19 avanga vanduaina leh thihna karah vawiin ah Saitual District chuan vanneihna changin, damlo enkawl nana pawimawh tak, PSA Oxygen Plant hawnna hun buatsaih a ni chu lawmawm a ti a. Minister chuan damdawi ina thawktu doctor, nurse, lab technician, tifaitu te thlengin mi ten beiseina sang tak an hnen atangin an nei thin a, damlo enkawl kawngah hmel hlim pu, biaknuam ni turin a fuih a. Vawiina PSA Oxygen Plant hawn hi PMCARES hnuaia din leh bun a ni a, Mizoram chhung hmun 13 zingah Saitual District a tel chu lawmawm a tih thu leh, PSA Oxygen Plant bunna atana tha leh hun seng zawng zawng hnenah lawmthu a sawi tak zet zet a. Covid-19 in min chenchilh chhunga oxygen mamawhna phu hruk a nih theihnan leh tun hun chauh nilo a nakina Covid-19 kiam hunah pawh Oxygen Plant chu tangkai taka hman a nih theih nan, khawl enkawltute chuan uluk taka enkawl turin a ngenin a fuih bawk a ni. PSA Oxygen Plant hi hnawh sarum taka tih a nih avangin tlema tih that ngai deuh te awm thei a, chungah chuan hriatthiamna leh dawhtheihna nei turin a ngen bawk a.

Minister chuan Keifang-ah Solar Plant Power Supply Mega Watt 10 pe chhuak thei tur tun favang-ah rokhawlhna a awmloh chuan bun theih a hmalak mek a nih thu leh North Lungpher ramah Solar plant Megawattt 30 pe chhuak thei bun tum a ni thu a sawi bawk a. Saitual chu Solar City atan puan theih tura hmalak mek a ni tih tarlangin, ni zung chakna hmangin kawtthler te a eng thei thuai ang tiin a sawi a. Rooftop Solar pawh a duh apiang tan subsidized rate 60:40 a a awm thuai tur thu te pawh Minister hian a tarlang a.

Heng bakah hian Minister chuan District Hospital a hman tur X-ray khawl leh ECG te a rang thei ang bera ngaihtuah a nih tur thu te a sawi bawk a ni.

June ni 18, 2021-ah Government of India chuan Covid-19 dona turin, Mizorama Hospital sawm leh pathum (13) a Pressure Swing Adsorption (PSA) Oxygen Generating Plant din phalna hmuh a ni a, heng khawlte hi PMCARES atanga din/bun tura ruahman a ni.

PSA Plant dinna tur Hospital zingah hian Saitual District Hospital chu 250 LPM bunna tura thlan ani. He PSA Oxygen Plant-in a tum ber chu damlo-Covid emaw natna dang vei tu pawh a mamawh tuten Oxygen hniang hnar taka an dawn theihna tura ruahman a ni.

PSA Oxygen Plant-in a ken tel hi- Medical Gas Pipeline System (MGPS)- Emergency Response and Health System Preparedness Package (ECRP)-II atangin bun fel a ni. Diesel Generator (DG) Set- PSA Plant back up nan ECRP-II atangin bun turin hma lak mek a ni. Dedicated Electric Transformer (250KVA)-PSA Plant chawmtu atan ECRP-II atangin P&E Department in an bun a ni.

He hun hi Dr. V. Lalremruata, MO in a kaihruai a, Pu V.L Hruaizela Khiangte, DC Saitual District hnen atangin thusawi ngaihthlak a nih bakah Pu H.Lallianmawia, SDO (P&E) hnen atangin technical report ngaihthlak a ni.