No.2506/2021-2022

Aizawl the 7th October 2021: Vawiin chawhma khan District Hospital, Kolasibah PM Cares hnuai a Pressure Swing Adsorption (PSA) Medical Oxygen Generation Plant, 250 LPM pechhuak thei tur chu Dr.H.Lalthlangliana, Deputy Commissioner-in a hawng.

Dr.H.Lalthlangliana chuan Covid-19 hri kai enkawlna kawnga hmanraw pawimawh tak, Oxygen Generation Plant, PM Cares hnuai a District Hospital, Kolasiba hawn theih a buatsaih a ni chu lawmawm a tih thu sawiin Oxygen duh khawp awm loh avanga harsatna leh thlaphanna awm thin chu Kolasibah chuan a ziaawm phah dawn hle a a rin thu a sawi. DC chuan khawl enkawl hautak leh a tangkai dan tur anga chhawr zui tlak loh ni lo turin leh a mamawh apiangten damna leh hriselna an chan phah theihna turin duhsakna a hlan. Dr.H.Lalthlangliana chuan Kolasib district chu Mizoram luhkapui a nih avangin District Hospital dawrtu pawh Kolasib district pawn leh state pawn lam mi leh sa thlenga an awm thin thu sawiin hemi kawngah hian mi tumah enhranna awm lova, dam lote intluktlang tak a enkawl zel turin District Hospital-a thawktute a chah bawk a ni.

PM Cares PSA Oxygen Generation Plant hawnna hun hi Dr.Doris Lalnunmawii Sailo, DMS-in kaihruaiin Pu C.Lalzarliana, EE, P&E, Kolasib Division leh Dr. Lalhlimpuia, CMO, Kolasib ten thusawina hun an hmang bawk a ni. Vawiina hawn tak, Oxygen Generation Plant khawl chawmna tur hian 250 kVA Transformer hi P&E Department ten an bun sak nghal a, Oxygen Pipeline System hi siam mek niin hman theih tur a peihfel thuai beisei a ni. Vawiina Mizoram District Hospital hrang hranga PM Cares hnuai a PSA Medical Oxygen Generation Plant hawnna zingah District Hospital, Serchhip chu India Prime Minister Narendra Modi-in Video conference kaltlangin a hawng (Virtual Inauguration) a ni.