No.2507/2021-2022

Aizawl the 7th October 2021: Vawiin chawhma dar 10:30Am khan Siaha District Hospital bakah Siaha District a PHC te chawmtu tur PSA Oxygen Plant chu hawn a ni. He hawnna programme hi Pu Abraham Beirazi Khithie, Additional Deputy Commissioner chuan a kaihruai a ni.

Vawiin PSA Oxygen Plant hawnna a khuallian Shri Kesavan R, IAS, Deputy Commissioner, Siaha District, Siaha chuan thu sawiin, hetiang hmasawnna leh kan district tana mamawh em em Oxygen Plant kan neih hi a lawmawm hle a, vawiinah hian India state dangte pawhin kan hawn rual hian a hawnna programme an hmang ve mek a ni tiin, a khawlpui te hi PM Cares (Prime Minister's Citizen Assistance and Relief in Emergency Situation) Fund atanga kan dawn a ni a. Tin, Mizoram sawrkar atangin a building sak hnate, Power Supply tura 250 KV transformer bun leh a behbawm te chu siam a ni, a ti. Tun dinhmunah Medical team te hi an thawkrim em em a, he oxygen plant kan neih atang chuan Aizawl lama Oxygen refill pawh a ngai tawh dawn lova, thawktute tan pawh a lawmawm dawn hle a ni, a ti.

Dr C. Lalrosanga, District Medical Superintendent chuan Technical report pehin, he PSA Oxygen Plant hi 500 LPM a ni a, minute khatah oxygen 500 litres zel a siam chhuak thei dawn a, chu chuan Khum 200 vel chawm thei tura beisei a ni, a ti. A Storage hian 3000 litres a khawl thei a, 3000 litres khawl tur hian darkar 6-8 hun a mamawh a, Siaha District Hospital hian tunah 40 outlets kan neih mek a, chumi chuan damlo 40 te a rualin a chawm thei dawn a ni. Tun dinhmunah Siaha District Hospital-ah oxygen cylinder hmanlai 200 kan neih mek a, bur khat hi 10 litres dawng a ni a, thla khatah vawi hnih tal refill thin a ni, a ti. Tuna PSA storage tank hian oxygen cylinder 300 nen an intluk chiah a ni, a ti. He PSA Oxygen Plant mamawh ber pakhat chatlak lova power supply min chawmtu tur pawh Power & Electricity Department lam chuan Transformer tharhlak 250 KV pawh min lo bun felsak tawh bawk a ni tiin, power supply khaihlak changa backup tu atan 500 KV DG set pawh bun fel tawh a ni, a ti bawk.

Pu Sangte chuan sawi chhunzawmin, Oxygen Pipeline system pawh kum kalta ah khan siam tawh a ni, a ti a. Site preparation pawh kumin May ni 27 atang khan thawh tan a lo ni tawh bawk a ni, a ti. Tuna Oxygen plant khawl hi dt 27th Sept, 2021 khan Siaha hmun thlenpui tawh niin, Engineers rual ten ngawr taka thawk chhunzawm zelin, nimin khan installation hna chu thawh zawhfel a lo ni bawk a ni, a ti.

Dr C. Hnichho, Chief Medical Officer chuan lawmthu sawiin vawiin programme hi a titawp ta a ni.