No.3554/2020-2020

Power & Electricity Minister Pu R.Lalzirliana chuan nimin atang khan Champhai District chhung Tuipuiral khaw hrang hrang lirnghing tuarte tlawhkualin a zin. Nimin khan Khawbung leh Farkawn khuate tlawhin khawtlang hruaitute nen inkawmhona hun an hmang a. Tuipuiral Group YMA kaihhruaina hnuaiah inkawmhona leh inrawnkhawmna hun Govt. Farkawn Middle School-ah buatsaih niin, Tuipuiral Group YMA kutah tanpuina sumfai  Rs 50,000/- a hlan a ni.

P&E Minister chuan khawchhak tlang dung khaw hrang hrang te'n lirnghing avanga harsatna an tawhte a hmun ngeia tlawha hriatpui tura zin an nih thu sawiin, tih theih tam em em lo mahse theih ang tawka hmalak theihna zawna tanlak pui a tum thu a sawi a. Covid-19 vangin sawrkar sum dinhmun tha tawk lo mahse theihtawp chhuaha an harsatnate ah hmalak sak sawrkarin a tum a ni, a ti a. Lunggaihna intawmpuia, tawrhna leh thlaphannate inchhawk zangkhai thin hnam kan nih anga he hun hmanga rawn zin hi kan ni, a ti bawk.

Pu R. Lalzirliana chuan Chief Minister hmalaknain lirnghing tuar khuate  tan  Solar Street Light 100 Tuipuiral khaw hrang hrangah sem anih tur thu sawiin, YMA Branch te chu phungbawmah sawmin, sem tur 100 bakah  chah lawk 71 te nen avaiin Solar Street Light 171 an rawn ken  thu a sawi a. Solar Study Lamp pawisa pek  lawk tawh 855 an rawn ken tel  thu pawh sawiin, heng baka 945 dang an rawn kente pawh Subsidy rate-in  lirnghing tuarte hnena an pek tur thu a sawi bawk.

Pu Rochhunga Ralte, Vice Chairman, Land Revenue & Survey Board pawhin thu sawiin, Tuipuiral khaw hrang hrang lirnghing tuarte manganna  hmun ngeia kalchilha hriatpui tur leh a tul anga hmalak sak tuma P&E Minister hova lokal an nih thu a sawi bawk.

He hun hi Pu H.Lalniliana, President, Tuipuiral Group YMA chuan kaihruaiin, inlawmna thu Pu J.H Lalkrosthanga, Vice President in a sawi a. Pu R.Lawmzuala, VCP Farkawn in thu a sawi bawk a. Dr.Lallenmawia, Sr. Consultant, DM&R pawhin he hunah hian lirnghing chungchanga hriattur tulte a sawi a. Group YMA Secretary Pu MC Lalramenga'n Tuipuiral khua lirnghing avanga chhiatna thlengte a report a ni. Pu R.Lalremruata, Asst Secretary, Tuipuiral Group YMA in lawmthu sawina hun hmangin a khar a ni.

P&E Minister Pu R.Lalzirliana hi Pu Rochhunga Ralte, Vice Chairman, Land Revenue & Survey Board, Dr. Lallenmawia, Sr. Consultant, DM&R, Er. David Ramnunsanga, Director ZEDA,  Er. Lalzorama, SE P&E Champhai Power Circle, Er.J.H Malsawma PD ZEDA, Dr. Lallawmkima DIPRO, Pu Obed Lalmalsawma SDC leh Official dang te'n an tawiawm a ni.