206/2023-2024

Khawzawl, the 25th April, 2023: Sawrkar laipui Ministry of New & Renewable Energy (MNRE) leh Mizoram Sawrkar tangkawpte siam nizung chakna hmanga kawlphetha Mega Watt 20 (20 MW) pe chhuak thei Vankal Solar Park, North East a hmasa ber leh lian ber, cheng nuai 2107 senga din chu tangkai taka hman theih turin Power & Electricity (P&E) Minister Pu R.Lalzirliana chuan vawiin chawhma khan khuallian niin a hawng. He hunah hian Human Resources Development Board Vice Chairman Dr. L.Thangmawia, MLA chu khualzahawm niin, P&E Minister hi Health & Family Welfare Board Vice Chairman Dr. ZR. Thiamsanga, MLA leh Road & Infrastructure Development Board Vice Chairman Er. H.Lalzirliana, MLA te'n an tawiawm bawk a ni.

Khuallian P&E Minister Pu R.Lalzirliana chuan Vankal Solar Park puitlin a nih theih nana ram petu Vankal khawtlang mipuite chhuanawm a tih thu sawiin, Solar Park chu hawn fel ni tawh mahse, a venhim leh enkawl zui zel kawngah neitu thinlung pu chhunzawm zel turin a fuih a. Hripui leng avanga hna a khaihlak hnuah Department leh hnathawktute'n theihtawp an chhuah leh, Sawrkar hmasa atanga ruahmanna awm tawh Sawrkar tharin chhunzawma Vankal Solar Park hawn a ni ta chu lawmawm a tih thu a sawi a. Nitin khawsak kawngah power supply tel lova nun a harsat tawh thu leh hnathawhna hrang hrangahte a tel lova hmalak a harsat thu sawiin, power supply khaihlak leh line chhiate thahnemngai taka chhun leh zana viltu Department thawktute fakawm a tih thu a sawi a. Thawktute zingah awlsam taka sum leh pai siam tum an awm a, man chhuah an nih chuan an chungah dan anga hmalak zel tum a ni, a ti a. Mipuite chu Department hmalakna tha taka thlawp zel turin a sawm nghal bawk.

Khualzahawm Dr. L.Thangmawia chuan a bial chhung Vankal khuaa North East-a Solar Park lian leh hmasa ber ni tur hawn a ni chu lawmawm a tih thu a sawi a. Mahni khaw bil tan nilo, Mizoram tana malsawmna ni tura an khaw ram tha lai phal taka petu Vankal khawtlang mipuite fakawm a tih thu a sawi a. Vankal Solar Park chu ram tana rotling a nih angin a venhim kawngah Department leh Company lamte tha taka tawiawm turin a fuih a. Khaw panna kawngpui tha, kawlphetha leh hriselna lama hmasawnna Health Clinic an nei thar chu a lawmpui thu a sawi a. A bial chhunga kawlphetha changtlung zawk lakluh leh sem chhuah a nih theih nana hmalakna awm mekte a tarlang bawk.

A hawnna puala inkhawm vawiin chawhnua Vankal Community Hall-a buatsaih hi Er.Lalhmingliani Hmar, Engineer-in-Chief, Power & Electricity Department chuan kaihruaiin kalkhawmte inhmelhriattirna hun a hmang a. Pu H.Lalengmawia, IAS, Commissioner & Secretary, Power & Electricity Department chuan kalkhawmte lawmna thu a sawi a. Upa Lalkrosthanga'n hunserh hmangin Er. K.Duhsanga, Superintending Engineer, Champhai Power Circle-in technical report a pe a. He hun hmanpuitu H&FW Board Vice Chairman Dr. ZR. Thiamsanga, MLA leh Road & Infrastructure Development Board Vice Chairman Er. H.Lalzirliana, MLA te'n thu an sawi bawk a. Er.Lalbiaksanga, Chief Engineer (Distribution) in lawmthu sawiin hun hman hi a khar a ni.

Vankal Solar Park hi State Sawrkar sum cheng nuai 1707 leh Sawrkar laipui Ministry of New & Renewable Energy (MNRE) sum cheng nuai 400, avaiin cheng nuai 2107 senga din a ni a. Civil Work thawh nan hian cheng nuai 272.38 sen niin, Electrical Work thawh nan cheng nuai 1834.77 sen a ni. Kum 2018 August thlaah lungphum phuma bultan niin, hripui leng avanga hna a khaihlak avangin a zawh hun tura ruahmanah zawh hman a ni lo a. February ni 16, 2023 khan hlawhtling taka trial commissioning tih niin, March ni 18, 2023 khan Commercial Operation tih tan a ni.

Solar Plate bun hna hi Solar Developer 2: M/S Sunfree Northeast Renewable Energy Pvt. Ltd. leh M/S ATA Renewable P4 Pvt. Ltd. te'n an thawk a. M/S Sunfree Northeast Renewable Energy Pvt. Ltd. hian Power MW 15 siamna tur buaipuiin, M/S ATA Renewable P4 Pvt. Ltd. in Power MW 5 siamna tur an buaipui thung a ni. Hawn a nih hnu kum 25 chhung enkawl hna Company te'n an thawk chhunzawm dawn a. Hemi atanga power siam chhuah hi Mizoram Sawrkarin man tlawm zawkin Rs 3.94/unit-in a lei thei dawn a ni. Tunah hian phai lam atanga lei aiin unit khatah cheng khat aia tam zel State Sawrkarin a hum thei a ni.

Vankal Solar Park-ah hian power lak luh leh pek chhuahna tur 232/33 kV Sub-Station leh Control Room-te bunfel niin, hmun dang atanga power lokal nen thlunzawm niin, Mizoram puma hman theih tura ruahman a ni. Ram acre 144 a zauah Solar Plate/Module 52453 bun a ni a, heng bakah hian Inverter 113, Inverter Control Room (ICR) 7 leh Main Control Room (MCR) 1 a awm bawk a. Chhinchhiah danin Vankal Solar Park hian vawiin khan a chak lai berin power Mega Watt 19.06 thleng a pe chhuak thei a ni.