207/2023-2024

Vawiin khan Er. Lalrinawma, Minister Social Welfare, etc. chuan ruihlo do beihpui thlakdan inzirtirna (orientation) hun Mizoram Rural Bank Main Office, MINECO, Khatla-a neih a hmanpui.

Minister Er. Lalrinawma chuan ruihlo kaihhnawihin nghawng a neih nasatzia sawiin, riuhhlo dona kawngah mitin mahni mawhphurnaah la a, mahni awmna hmun apiangah theihtawp chuah a pawimawh a ni a ti a. Zu leh ruihhlo do chu midang kutah dah mai lova, a remah leh rem lovah pawh a remchang dan anga a puanzar zel a pawimawh a, sorkar laipui pawhin hemi kawngah hian theih tawp a chhuah thin thu a sawi. Mahni mihringpuite chhanchhuah hnathawh hi mitin tih makmawh leh an nitin khawsak phung a nghawng thin bawk avangin Mizoram hi ruihhlo chi hrang hrang zawrh leh tawlhrukna kawngpui pakhat a nih avang hian danin a phal loh ruih hlo zawrh hi tirem turin theihtawp chhuah zel a tul a ni a ti.

Sorkar hnuaiah Excise and Narcotics Department, Police leh NGO ten ruihhlo tihrem nan 'supply reduction programme' a kalpui mek a. Mizoram Social Defence & Rehabilitation Board, Social Welfare & Tribal Affairs Department lam pawhin thalaite zinga ruihhlo hluar zel chungchangah zirbingna (Drug Survey) te neiin leh thalai/naupangte ruihhlo tilo tura zirtirnate pein, demand reduction programme chu school, college leh hmun hrang hrangah te a kalpui reng thu a sawi bawk. Ruihhlo ngaite enkawlna hmun Drug Rehabilitation Centre chu rualkhai taka inenkawlna kalpui anih theih nan thawktute training an pek thin thu sawiin. Mizoram State AIDS Control Society (MSACS) pawhin ruihhlo ngaite zingah pawi (harm) nasa lehzual zawk (inchiuna thianghlimlo hman avanga natna hrang hrang HIV/AIDS, Hepatitis C, etc.) a thlen loh nan (harm reduction programme) an kalpui reng bawk a. Sorkar hmalakna thlawpin CYMA leh tlawmngai pawl thenkhatten nasa takin tha an thawh mek zel bawk a ni a ti. Working Committee hian ruihhlo dona kawngah chak zawka hmalak anih theih nan Supply reduction, Demand reduction leh Harm reduction te mumal taka thawhho tul takzetin a hria a, ruahmannaye siamin District tinah Deputy Commissioner Chairman-na hnuaiah District Level Task Force din vek tawh a ni a. Vawiin hian District leh Village level-ah ruihhlo dona kawnga thawhho dan tur te inhrilhhriata/zirhona Orientation training hi buatsaih a ni.

Vawiin hun hi Pu KT Beicho, Principal Secretary, Excise & Narcotics Dept. in kaihruaiin Presentation hi department hrang hrang hnen atangin hetiang hian ngaihthlak a ni : Supply Reduction chungchang – Peter Zohmingthanga, Asst.Comissioner, Excise & Narcotics Department, Demand Reduction chungchang – Pi Vanlalhruaii, Social Welfare & Tribal Affairs, Harm Reduction chungchang – Pi Lalrinmawii, MSACS. Hemi hnu hian sawihona hun tha tak neih niin C. Zodinpuii, Joint Director, SW&TA-in lawmthu sawiin hun hnung a khar a ni. He Orientation training-ah hian District tina DC leh SP te, Mizoram Police, Excise & Narcotics Department, Social Welfare & Tribal Affairs Department, Food & Drugs Administration, MSACS, Sub- Headquarters hrang hrang YMA aiawh pahnih theuh bakah YLA leh MTP aiawhte an tel a ni.