Thingtlang mipuite hmasawnna tur scheme hrang hrang sorkar laipui hmalakna hmarchhak bial Rural Development Department-ten an kalpui dan thlirletna Performance Review Committee Meeting chu vawiin khan Aijal Club-ah neih a ni a, Union Secretary for Rural Development S Vijay Kumar IAS chuan meeting hi a kaihruai a ni.
Union Secretary S Vijay Kumar chuan Rural Development hmalakna hrang hrangte tarlangin hmasawnna rualkhai zawka a kal theih nan India khua leh tui zawng zawng ten heng hmalakna hi a takin an chhawr tangkai ngei tur a ni, a ti. Inbiakpawhna leh inkalpawhna lamah hmarchhak state te hian harsatna an tawh avangin Rural Development Scheme hrang hrang te chu duh ang a chakin kalpui a harsatzia sorkarin a hriatthiam thu a sawi a. Chuvangin ram chhung State lian zawkte el phaka hmarchhak bial hian chak taka ke a pen ve theih nan heng harsatna te chinfel dan kawng thar tha zawk dap a tul a ni, a ti. Hmarchhak state te harsatna chinfel dan tur rawtna ngaithla turin sorkar chu a inhawng reng tih sawiin vawiin PRC meeting-ah hian State ten an harsatna te zalen taka sawi a, a chinfel dan ngaihtuah tlang turin a sawm a. Secretary chuan sorkar hmalakna hlawhtlinna tur chuan a tak taka mipui ten hna an thawha, sorkar an thlawp tlat a tul a ni, a ti bawk.
Mizoram Rural Development Secretary Pu K Riachho IAS pawhin thu sawiin harsatna tam tak karah rethei zawk te khai chhuak tura sorkar hmalakna pui turinMizoram chuan ram dangte neih ve loh remchanna tam tak a neih te a tarlang a. Chung zingah chuan remna leh muannate, ziak leh chhiar thiam percentage sang tak a neih te, rethei leh harsa te tanpuitu tlawmngai pawl hrang hrang te leh inthliarhranna awmlo khawtlang nun inpawh tak a neih te chuan mipuite tana sorkarin hma a lakna kawngah nasa takin a pui a ni, a ti.
Vawiin meeting-ah hian Mahatma Gandhi National Rural Employment Guarantee Act (MGNREGA), Sampoorna Grameen Rozgar Yojana (SGRY), Socio Economic Census, Indira Awaas Yojana (IAY) leh National Social Assistance Programme (NSAP)hmarchhak state tin ten an kalpui dan uluk taka thlirho a ni a.
He meeting-a tel tur hian Ministry of Rural Development atangin Secretary bakah Additional Secretary, Special Secretary, Joint Secretary 7 leh official dang 18 bakah Meghalaya, Manipur, Tripura, Nagaland, Sikkim leh Arunachal Pradesh atangin official 20 zet an lo kal a ni.
