Serchhip leh a chhehvela NLUP tanpuina dawngtute hmalak dan zirchiang turin phailam chanchinbu mi pahnih Pu Deepak Dewan, North-East Sun Chief Editor leh Pu B.B. Lakhar, Assam Tribune te chuan nimin khan Serchhip an tlawh a, Journalist te hi Pu David L. Thangliana MIS, NLUP Chief Media Officer in a rawn hruai a ni.
Chanchinbu mite hi Serchhip District Bawrhsap Pu P. Lalchhuanga leh District chhunga NLUP Line Department hrang hrang ten lo mikhualin an hmalak dan te leh an hmasawn dan te an lo hrilh a, Mat phaia Oil Palm Nursery (Agriculture Dept.) te, Zawlpuia NLUP beneficiary te Sangha Dil (Fishery Dept.) te an tlawh a, Dawngzawlah chhun chaw fakin Saphai Rama Sangha Dil te, Khangpui Zau, Keitum leh Bungtlang a Agriculture, Horticulture leh Sericulture Department hnuaia NLUP tanpuina dawngtute hmalakna an en a, Serchhip khawchhunga AH&Vety Department hnuaia NLUP Vawk leh Ar vulh te an en bakah Tarpi tlanga Soil & Water Conservation Department hnuaia NLUP hmunphiah hmun te an en bawk.
Chanchinbu mi te hian nimin tlai khan Serchhip District Bawrhsap Pu P. Lalchhuanga chu a chenna inah hmu in NLUP chungchanga District chhunga hmalak anih dan te leh ruahmanna kalpui zel dan tur te an zawt a, NLUP dawngtute hmalakna chu hmuhnawm an tih thu leh anmahni pawh a tih phur ve zia sawiin; NLUP hi a nih dan tur ang taka hlawhtlinpui anih chuan rampum tan entawn tur tha tak anih dawn a an hriat thu an sawi a, tuna Mizoram sawrkar hmalak dan chu entawntlak ni a an hriat thu an sawi bawk. District chhunga Line Department hrang hrang aiawh ten an lo dawnsawn danah leh Bawrhsapin a lo mikhual danah lawmthu an sawi bawk a ni.
Chanchinbu mite hi an kalna apiangah Serchhip District NLUP Nodal Officer Pu Robert Lalhmangaiha MCS leh Line Department aiawh ten tawiawm zelin NLUP Chief Media Officer hovin NLUP tanpuina sum hmang tha leh hmang thalo te chungchang pawh an sawiho nghal zel a, Chief Media Officer chuan NLUP tanpuina dawngtute hmalak dan ah diklo leh thalo a awm chuan kimchang taka report hreh lo turin a ngen nghal bawk a ni.
Chanchinbu mite hi nizan khan Serchhipah an riak a, vawiin chawhma khan Baktawng Tlangnuam tlawhin NLUP hnuaia Industries Department (Aluminium utensils) leh Soi&Water Conservation Department (Hmunphiah) hnathawh dan te an en a, hemi hnu hian Aizawl lam panin an haw nghal a ni.
