Mipui ten computer leh internet hmanga sorkara lungawilohna an neih leh an thil hriat duh an zawh zung zung theihna tura hmanrua ‘website’ thar, Mipui Aw tia vuah, sorkar laipuia Department of Administrative Reforms and Public Grievances leh Mizoram sorkar bultum Centralized Public Grievance Redress and Monitoring System (CPGRAMS) chu vawiin khan Chief Minister Pu Lal Thanhawla chuan Mizoram Legislative Assembly Secretariat Conference Hall-ah bul tanna tur a tlangzarh.

Chief Minister chuan mipui ten computer leh internet hmanga lungawilohna leh an thil hriat duhte an zawh zung zung theihna tura hmanraw thar, Mipui AW kan han nei ve thei ta hi a lawmawm tak zet a ni a ti a. Ram hmasawnna kawnga hnathawhnaah thil fel tawklo tam tak a awm thei a, chu chu ngaipawimawhin sorkar laipui chuan hetiang programme a rawn duangchhuak hi thil lawmawm tak a ni a ti a. Mizoram sorkar pawhin a hmingah Mipui AW tih a han vuah te pawh hi a awm hle a ni a ti. Hei hi mipui mimirin a tangkai thei ang bera hmang thin se tih a duhthu a sawi bawk a. RTI te pawh an hman tangkai viau laiin, duh anga mipui zawhna te chhan that tawk loh a awm thin avangin Mipui AW hi chu tangkai thei ang bera hmang turin a chah a ni.

Chief Minister chuan thingtlang hmasawnna tur hnathawhna sum te hi a thawktu ten kan it ve ngawt emaw, kan lo beisei ve ngawt hi a thianglo a ni a ti a. Mizote hi tlemte, inhre chiang vek, tunge eiru a tunge mi dik tih inhre tawn vek kan nih avang hian, han insawisel leh thil diklo report te kan hreh phah a, chutih laiin insawipui kan uar viau si hian dikna  (justice) dinhmun a tiderthawng ang tih a hlauhawm hle a ni a ti a, a pawi hle a ni a ti.Chuvangin dikna leh rinawmna hi kan kengkawh tur a ni a, kan dik hmasak phawt chuan mipui chuan min zui mai dawn a ni, a ti. Mipuite pawhin sorkar programme-te anih tur angin kalpui a ni em tih Mipui AW hmang hian kan zawt zung zung thei tawh dawn a ni a ti a. District tina DC te hnuaia Public Grievance Redressal Cell hi hmang tangkai turin mipuite a chah bawk a ni.

Sorkar laipuia department of Administrative Reforms and Public Grievance a joint secretary P.K.Jha pawhin Mipui AW hi a hrilhfiahin, kum 2007a bul tan, kum 2008 a hman tan anih thu a sawi bawk a.

Tlangzarh inkhawm lawmna thuchah sawitu Pu Van Hela Pachuau, Chief Secretary chuan Mipui AW hi Mizoram sorkar inrelbawlna kawnga thil chhinchhiah tlak a ni a ti a.Mipui mimirin sorkarin an tana ruahmanna leh hnathawh a neihte chiang takin an hriat theih phah ngei dawn a ni a ti.

CPGRAMS hi powerpoint hmangin National Informatics Centre, Aizawla hotu ten a sawifiah bawk a ni.

Mipui AW PG Portal hi mipuiaw.nic.in ah tlawh theih reng a ni.