Nimin khan Minister Pu Zodintluanga hovin Urban Development & Poverty Alleviation (UD&PA), Public Health Engineering (PHE) leh State Investment Programme Management and Implementation Unit (SIPMIU) aiawh official ten New Secretariat Conference Hall-ah meeting pawimawh neiin Aizawl khawpui chhunga mipuiin hnianghnar zawka tui  thianghlim in tur an dawn theih dan tur an ngaihtuah.

Minister Pu Zodintluanga chuan department hrang hrang ten tum thuhmun neia hna an thawh theuh laiin inhriatpawh loh avangin hna insu buai leh project insiam thuah a awm  palh thei a, sawt zawka department ten mipui tana hna an thawh theih nan inpawh tlang taka thawhho a tul a ni, a ti.

Meeting-ah hian SIPMIU chuan a lem nena entirin an project thawh mek, thawh zawh tawh leh thawh hmabak an sawifiah a. PHE in pipeline an siamthat mek nen insu buai lova, hna thawh tur duan chin an inhriat sak theih nan te, hnathawh tur duan lawk fiah taka thliar fela, SIPMIU leh PHE thawh tur chin tih chian dan tur an sawiho a ni. SIPMIU leh PHE Department chuan SIPMIU Project Director kaihhruaina hnuaiah thla hnih danah an hnathawh dan thlirhona meeting neih thin ni se, an ti a. SIPMIU atanga tihtur duan lawk zawng zawng chiang taka hriat a nih hnuah a la bang tihtur awm apiang blueprint siam ni se, a pawimawh dan indawtin heng hna thawh tur hmabak te hi kawng dang atanga sum ngaihtuah a thawh thin ni se an ti bawk.

Thawhho dan tur ruahmanna ansiambakah meeting chuan SIPMIU leh PHE hnathawh mek an thlirho nghal a. Uluk lehzuala vil an tum thu leh fur ruahtui tam hmaa sawt zawka hnathawh dan tur an sawiho nghal bawk a ni.

Meeting-ah hian PHE Secretary Pu V.Lalremthanga leh official pawimawh dangte bakah contractor-te an tel a ni.