2368/2026-2027

Saitual, the 25th September, 2026: Vawiin khan Keifang Centenary Sports Complex-ah 5th Saitual District Secondary School Sports 2026 kharna hun hman a ni a, Minister of State, PHE, RD&AD etc. leh Tawi bialtu MLA ni bawk, Prof. Lalnilawma chu khuallian niin hun a hmanpui.

He hunah hian khuallian Prof. Lalnilawma chuan thu sawiin, Saitual District Secondary School Sports tluang taka neih zawh a ni thei chu lawmawm a tih thu a sawi a. Infiammite tan sports infrastructure tihchangtlun nana hmalak chhoh mek zel a ni, tih sawiin, District Bawrhsap hmalaknain Keifang Centenary Sports Complex-ah pawh eng (light) dah a ni dawn a ni, a ti.

Minister chuan infiamna “sports” chu mihring min chhertu a ni, a ti a, zirlai naupangte chu lehkha zir ngai pawimawh hmasa ber turin a chah a, chutih rual chuan taksa sawizawia, taksa hriselna atan infiamna chi hrang hranga tel thin a pawimawh thu a sawi. Khuallian chuan UD&PA leh PHE department-te tangkawp chuan faina hapta an kalpui mek a ni, a ti a, October ni 1-ah school leh office tihfai runpui neih a nih tur thu sawiin, zirlaite chu faina kawngahte pawh theih tawp chhuah zel turin a chah a ni. Minister chuan Saitual District-a zirlai naupangte chu Mizoram pum inelnaahte lang pha tura tan la turin a chah a, zirna leh infiamna kawngahte, faina ngaih pawimawh kawngahte theih tawp chhuah zel turin a sawm bawk a ni. 

5th Saitual District Secondary School Sports 2026 chhunga a pumpuia lawmman late chu: 

1st- Govt. Saitual High School-II

2nd- Govt. Saitual High School 

3rd- Graceland Adventist School, Keifang 

Medal hi gold-21, silver 21, bronze 24 a vaiin 66 sem a ni. Vanlalnunpuia, Govt. Saitual High School-II in gold pathum (3), V. Lallawmzuali, Govt. Saichal High School in gold pahnih (2) leh Lalthanpuii, Graceland Adventist School, Keifang in gold pahnih (2) an la a, an ni hi he sport chhunga infiammi tha (best athlete) atana thlante an ni. 

Vawiin 5th Saitual District Secondary School Sports 2026 kharna inkhawm hi Pu Laldingliana, DEO & DPC chuan a kaihruaia, Pu CVL Hmachhuankima, Secretary Technical Committee hnen atangin report ngaihthlak a ni. Khuallian Prof. Lalnilawma bakah Pu Ramtharmawia, SFL, DHEW ten thu an sawi a, khuallian hian lawmman a sem nghal bawk a ni.  

Vawiin inkhawmah hian Pu Laldingliana, DEO & DPC, Pu V. Laldinsanga, PD, DRDO, Er. Lalpektluanga Sr. EE, PHE Er. K. Malsawmkima, SDO, PHE, Pi F. Zodingpuii, DIPRO, Pu R. Lalhmangaiha, Deputy DPC, Pi Mary Malsawmkimi, DMC, DHEW te an tel a ni.