Nikum atanga sorkar laipuiin ram puma faina lama inelna chi khat ‘Swachh Survekshan Grameen’ chu kuminah pawh tih chhunzawm tur a nih angin vawiin khan PHE Minister chuan ‘Mizoram State Swachh Survekshan Grameen-2018’ inelna chu ama office chamber-ah a hawng ta. He Faina Inelna hi thingtlang khuate inelna tur bik a ni a, a kengkawhtu tur PHE Department chuan endikna hna leh reporting zawng zawng pawh a buaipui zui dawn a ni. 

State Swachh Survekshan Grameen-2018 hawnna inkhawm PHED Commissioner & Secreatry Pu K.T.Beicho kaihhruaiah Khuallian Pu Zodintluanga chuan ramchhung hmun dangte ang bawkin Mizoramah pawh sorkar laipui duhdan angin nikum atangin faina inelna neih tan a ni a, a hmaa ‘Faina Hapta’ (Cleanliness Week) anga hman thin chu ‘Faina Kum’ (Cleanliness Year) tia thlakin, kum khat chhung huam tir zel a ni tawh tih a sawi a. Nikumah rampum huapa khawpui fai ranking-ah Aizawl chu 105-na chauh a hauh theih chu zirchian a nih hnuah inelnaa marks an pek danah faina hrim hrim chuan zaa 30% chauh a ni a, a dang 70% chu mipuite aw (public feedback) leh Online data reporting-ah pek daih a nih avangin marks hmuh san loh a lo ni a, chuvangin kuminah chuan he inelna lama a mawhphurtu officials turte pawhin mipuite feedback leh online data update hna uluk lehzual turin a chah. ODF leh faina lam hrim hrimah chuan ramchhung state dang, khaw dang aiin Mizoram leh a chhunga khuate an nep lova a hriat thu sawiin Pu Zodintluanga chuan faina lama kan ranking hi state hmel lanna pawimawh tak a nih avangin sorkar hmalakna apiangte chu mipui lamin an thlawp that a tul thu a sawi a. Media lamte pawhin Mizoram state leh mipuiten faina kawnga an hmalakna hrang hrangte, zokhua lam pawh faina kawngah an duai bik lohzia te phochhuak thiam turin he huna media kalkhawmte a chah bawk a. Khawlaia bawlhhlawh paihte hrem nan pawisa chawi tirna (littering fine) pawh tun atanga reiloteah Aizawl khawpuiah chuan tih tan theih thuai beisei a ni thu sawiin PHE Minister chuan mipuite thinlungah faina chungchang nghet taka tuh turin media-te hmalakna leh thawhpuina a pawimawh hle a ni, a ti bawk.

Mission Director, SBM-G leh Chief Engineer, PHED ni bawk Er.HCLalnunzira chuan ‘Mizoram State Swachh Survekshan Grameen-2018’ chungchang Technical Report a pe a. Baseline Survey 2012 Report-ah chuan Mizoram-ah ekin neilo/nei tha lo chhungkua 30067 an awm a, chung ho tan chuan ekin siam hna zawhfel tawh a ni a. Tichuan Mizoram chu Baseline Survey 2012 tehfung hmangin pawn lera inthiar awm lohnaa inpuang thei (Self-declared Open Defecation Free-ODF) a lo ni ta a. Baseline Survey 2012-in a huam loh chhungkua 30619 Insanitary Latrine neite chu nikum 2017-2018 chhung khan Swachh Bharat Khosh (SBK) sum hmangin sanitary latrine siam sak vek an ni bawk. Tun dinhmunah chuan Mizoram District 8 zinga 7-te chu Block, District leh State ODF verification zawh tawh a ni a; Lunglei District hi Block leh District verification tih mek niin August thla chhung hian State verification pawh tih hman beisei a ni bawk. 

Ministry of Drinking Water & Sanitation (MDWS) chuan Mizoram State chu ODF a nih chhunzawm zel theih nana hma la zel tura a beisei angin tunah hian bawlhhlawh sawngbawlna (SLWM) khaw tin tan ruahman niin hmalak tan mek a ni a, faina inzirtirna lam (awareness campaign) a tam theih ang ber neih tum a ni bawk. MDWS chuan India ram District zawng zawng inelna (District ranking) atan Swachh Survekshan Grameen a lo buatsaih ta a, Mizoramah pawh a endik turin Hindustan Thompson Pvt Ltd atanga mithiamte chu August thla khian lo kalin District tin an rawn endik dawn a, an tehfung chu hetiang hian a ni ang : 

1. Khawchhung faina, mimal in, School, Anganwadi, Sakhaw hmun leh vantlang hmuna sanitation dinhmun - 30%

2. Mipuite aw (feedback from citizens) - 35%

3. Online Report (Data updation as per IMIS) - 35%

Swachh Bharat Mission (Grameen) atan Nodal Department-ah PHED  ruat an ni a, anni hian Rural Development Dept, Social Welfare Dept, Health Dept, I&PR Dept, tlawmngai pawl leh kohhrante bakah media lamte nen thawhhona tha tak an nei chho zel a ni. Vawiina Faina Inlena hawnna inkhawm hi PHED Chief Engineer Er.C.Lallunghnema’n lawmthu sawina hn hmangin a khar a ni.