Vawiin khan Chief Secretary Pu Arvind Ray hovin Mizoram Science Centre din champha vawi 15-na lawmna hun Mizoram Science Centre Auditorium-ah hman a ni.


Chief Secretary Pu Arvind Ray chuan science leh mathematics thiamna lamah hma kan sawn nasa a,a lawmawm hle a ni, a ti a. Khawvel thang zelah science thiamna neih a pawimawh chho zela, UPSC civil service exam a tlingte pawh science background nei an tam tawlh tawlh a ni, a ti a. Zirlai naupang zawk ten awlsam taka science lam thil an hriatthiam zung zung a, class sang zawk an thlen hunah pawh tui taka an zir theih nan zirtirtuten tan an lak a ngai a ni, a ti a. Mizoramah science stream lama zir chhuak mi thiam tak tak an awm tawh a, heng thiamnate hi kan ramin hma a sawn theih nan kan hman dan tur ngaihtuah chian a ngaih thu sawiin hemi kawngah hian scientific officer-te leh Mizoram Science Centre a tangkai thu a sawi a. Mizoram Science Centre chu mizo thalai science lama tui ten tun aia nasa zawka an hman tangkai  ngei a beisei thu a sawi bawk a ni.

 
Mizoram Science Centre hi Directorate of Science & Technology leh Ministry of Culture hnuaia National Council of Science Museums (NCSM) tangkawpin July Ni 26, 2003 khan an din a. Kum 2017 khan Autonomous Government Institution-ah hlankai a ni. Mizoram Science Centre-ah hian thil hrang hrang awmin chungte chu-Forest Gallery, Fun Science Gallery, Mini-Planetarium, Auditorium, 3D Theatre, Outdoor Science Park te an ni a. November Ni 1, 2014 khan National Council of Science Museums (NCSM) leh Mizoram Science Centre ten ‘Innovation Hub’ leh ‘Space Science Education Centre’ dinna turin inremna thuthlung an ziak a. Mipui hman theih tura hawn thuai beisei a ni. Lunglei-ah Science Centre din a nih theih nan ruahmanna siam a ni tawh a. Mizoram Science Centre hi mipui tlawh theih turin Tuesday-Sunday hawn thin a ni.


Programme hi Chief Scientific Officer Dr.R.K.Lallianthanga’n a kaihruai a. Mizoram Science Centre Education Assistant Pu Lalrammawia’n Magic Show in hun a hmang a. Mizoram Science Centre Education Assistant Dr.Lalrinkimi’n ‘Mizoram Science Centre at a glance’ tih thupui hmangin presentation a pe a. Mizoram Science Centre Senior Curator Pu F. Lalramchuana chuan lawmthu sawina in hun a hmang a ni. Programme 3D Show leh demonstration of exhibits-in a zui nghal a ni. Mizoram Science Centre Governing Body Member te, Mizoram Science Centre Executive Committee Member te, Mizorama Science lama sulsutute, Aizawl school hrang hranga zirtirtute, Directorate of Science & Technology mi leh sate, Mizoram Science Centre-a hnathawkte an tel a ni.

Attachment

  • Loading attachment...