Ni thum chhung awh Workshop on Film Production and Script Writing, I&PR Auditorium a neih chu vawiin khan a hmawr bawk a ni ta a. Workshop a inziak lut zawng zawng hi mi 49 an ni.

Pu Lalsawmliana Pachuau, LPS Vision neitupa leh Mizoram Film Forum Patron ni bawk chuan film siamdan kimchang zirtirna a pe a. Pre-production, Production leh Post - production tihdan kimchang zirtirna a pek bakah vawiin khan practical training a neihpui a, film siam zirtute chu group hnihah thenin film tawi heng mite hian siamin an inel a, group pahnihte hnenah hian lawmman siamin Pu Lalsawmliana Pachuau chuan Rs. 5,000 /- (Cheng sangnga) ve ve a pe a ni.

Tlai lamah State Nodal Officer Pi Lallianpuii, MIS, Joint Director, I&PR hovin kharna hun hman a ni a, Certificate semna neih a ni. Kharna inkhawm hi Pu Lalawmpuia Khiangte, President, MFF in a kaihruai a, workshop film pahnihte thlirho (screened) a ni.

Workshop on Film Production and Script Writing hi Nodal Department, I&PR leh Mizoram Film Forum ten an buatsaih a ni a. Film siam zirtute hian heti lama tuimi a duh apiang tan dilna hun hawn a ni a, Aizawl khaw pawn atangin mi 5 an tel a, training zingah hian hmeichhia pariat (8) an tel a ni.

Hun hma lamah Dr. Irene Lalruatkimi, Associate Proffesor, MZU leh Enid H.Lalrammuani, Asst. Proffesor, Pachhunga University College ten Script Writing leh Language chungchang zirtirna hlawhtling tak an lo nei tawh bawk a ni.

Film hian mizo culture leh nunphung a taka a pho lan bakah tawng (language) zirtirtu an nih tel avangin tawng kauchheh uluk a ngai hle tih workshop ah hian uar taka sawi a ni a, film chu mass media zinga mitin thleng phak media chak tak anih avangin uluk taka film siam thin a tul thu sawiho a ni.