Mizoramah hian zirna kawnga rualawhna leh thahnemngaihna avangin mahni khuaah tlin leh tlin loh pawh ngaihtuah mang lovin hmun hrang hrangah khawtlangin private in school kan din thin a. Hetianga private school din a nih dawn hian School Education Department ah hawn phalna (permission) dan anga dil a ngai a. Permission pekna tur hian tehna hrang hrang 20 chuang a awm a. Higher Secondary School hawn phalna nei tura tehna hrang hrang zinga 3 (pathum) chauh tarlang ila;
a) "Kum lo kal zel tur atan he Institution hi tha takin Managing Committee-in a enkawl thei ang em? " tih a tel a. He zawhna hi School hawn diltu School Managing Committee te chuan an enkawl theih tur thuin an chhang vek a ni.
b) Tehna dang leh pakhat chu “The Mizoram Education (Establishment and Management of Private Higher Secondary School) Rules, 2006” Rule No.5 (3) in thawktute chungchang a sawi hi a ni a. Chutah chuan Teaching leh non-teaching staff-te hlawh, qualification leh service conditions te chu Sorkar phalnaa Department-in dan a siam ang tak chu an zawm tur a ni tih a inziak a. Higher Secondary School hawn diltu ten Department-in a siam dante - thawktute hlawh pek turte, qualification phut angte chu an zawm theih thu ziaka an tarlan avanga school hawn phalna hi pek vek an ni.
c) School hawn phalna pek an nihin Sorkar atanga tanpuina emaw hamthatna emaw an beisei theih loh tur thu ziakin hriattirna pek vek an ni bawk.
Hetianga dan hnuaia an inhuamna leh school pawh an enkawl theih tur thu ziaka dah thlap chunga tuna sawrkar tanpuina sang zawk ngiata Private HSS 9-te an nuar ta mai hi School Education Department chuan a beisei loh tawp thil a ni a, pawi a ti tak zet ani.
A chunga tarlan tak anga kawng hrang hranga tehna paltlang leh mawhphurhna lak huama private school te hi din ni mahse sawrkar chuan Managing Board/Committee te chhawk zangkhaina turin ruahmanna siamin, school engemaw zat chu kumtin tanpuina, Lump Sum Grant a pe hial zawk thin a. Tunah hian chutianga private school sawrkarin kumtina tanpuina (Lump sum grant) a pek mek chu a hnuaia tarlan ang hian school 7l an awm mek a ni:
a) Middle School 33 @Rs.1.20 lakh (33 x 1.2): Rs.39.60 lakh
b) High School <88>27@Rs.1.20 lakh (27 x 1.2): Rs. 32.40 lakh
c) HSS <92>11@Rs.1.50 lakh (11 x 1.5): Rs. 16.50 lakh
A vaia Lump Sum Grant atana kumtin Sorkarin sum a sen zat chu Rs. 88.50 lakh a ni. Lump sum grant pek an nih avang hian dinhmun tha zawk pek nana intiamkamna emaw kailawn emaw engmah a awm chuang lo a ni.
Lump sum grant dawng mek hi school 7l at awm laiin chung zinga HSS 9 chuan dinhmun tha zawk ngiatin a nuar zawngin tunah hian hma anla mek a. Hei hi School Education Department chuan pawi a ti tak zet a. An thil phut hi sorkar hian lo ti hlawhtling dawn ta pawh ni se anmahni ang tho, mahse nuar ve lo school 62 dangte pawh hi an chungchang ngaihtuah a ngai dawn a ni.
Tuna Lump sum grant dawng mek Higher Secondary School 9 te ngenna ang hian Adhoc GIA ah Lump sum grant school te hi hlan kai lo ni dawn ta se, a thawktu zawng zawngte hi Basic pay + 50% D.A. pek tur an lo ni ang a. Sorkarin kum khata sum a sen belh tur chu Rs. 20.84 crore vel a ni ang. Sawrkar hnathawk dang ang bawkin kum tin increment an hmuh ve dawn bakah, Senior Grade pay leh Selection Grade pay te an enjoy ve theih dawn bawk avangin senso hi kum tin a pung chho zel bawk dawn a ni.
Chutih mek laiin Lump sum grant tak ngial pawh la dawng phalo private school engemaw zat khawtlangin an din a awm bawk a ni. Sawrkar sum dinhmunin tlin se chuan hengte pawh hi tanpuina han pek vek theih hi School Education Department chuan a duh hle a ni.
School Education Department chuan Lump sum higher secondary school 9 te dilna hi zirna ngaih pawimawh loh vang ni lovin, tun dinhmuna tihhlawhtlin theih rih lovah a ngai a. Zirlaite hmakhua ngaia an nawrh mek hi titawp thuai turin School Education Department chuan Higher Secondary School 9-a Managing Committee te leh school-a thawktu te hi a ngen tak meuh meuh a ni.
