Vawiin khan Higher & Technical Education Minister Pu R.Romawia chu Govt. J.Thankima College Freshers’ Social Meet, 2018 ah khuallian niin, Hawla Auditorium-ah hun a hmanpui. 

Khuallian chuan thusawiin sawrkar-ah ringawta innghat lo turin leh mahni kut ke hmanga intodelh thei turin zirlaite chu a fuih a. Thangthar lehkha thiam  lo chhuak zel turte chuan mahnia eizawnna tur hna insiam thiam tur zawnga inbuatsaih zel turin a ngen a. Agro-Based Industry te pawh Mizoram-ah a that theih avangin, thalai leh zirlaite chu a dinna lamah hmala turin leh midang tan inhlawhna a nih theih avangin sawrkar pawhin a pui zel ang, a ti a. Ram chhung economy a lo that nan sum leh pai thawhchhuahte hi ram chhung ngeiah a hlawkna leh a hmangtu te kutah kual rei thei se, chu chuan ram economy a ti tha ang, a ti bawk a ni. Zirna lamah pawh sawrkar chuan hma thar lain, management zirna te a hawng thar tan a, Mizo te mamawh tak a ni, tiin a sawi a. Thiamnain tawp a neih loh avangin zir sang zual zel turin zirlaite a sawm bawk a ni.

Minister chuan Bachelor of Business Administration (BBA) zirna a hawng nghal a. Govt. J.Thankima College hi Mizoram sawrkar hnuaia College 24 zinga BBA Course hawng thei hmasa ber a ni a. Mi harsa zawkte pawhin an chhawr theihna tur thlirin BPL Family leh thingtlang hmun hla zawk atanga zir duh tan Tribal Scholarship pangngai bakah College hian Special Scholarship a ruahman sak bawk a ni. Tun dinhmunah BBA Course zirlai hi 14, zirtirtu 4 awmin, Dr. J.V Nunchunga chuan Head of Department charge a la mek a ni. Govt. J.Thankima College a BBA Course hi Mizoram University  hnuaiah Affiliation tih a ni.

He hunah hian Annual Magazine Hlimthla release niin, zirlai leh zirtirtu thahnem tak an tel a ni.