Vawiin khan Chhim veng YMA Hall Mamitah Deen Dayal Upadhyaya Grameen Kaushalya Yojana (DDU-GKY) Mela hawnna hun neih a ni a. Pu Bhupesh Chaudhary, District Bawrhsap chuan khuallian niin hawnna a nei a. Dr. Seema Gaur, IES, Chief Economic Adviser, Ministry of Rural Development and Panchayati Raj chuan a telpui bawk.

Khuallian chuan thu sawiin India ram chu thalai kum 35 hnuailam mihring tamna ber ram kan nih angin thalaite'n thiam thil an neih theih nan kawng hrang hrangah Training pek a tul takzet avanga he Scheme pawh hi duan a ni a. Mamit District chu Aspirational District kan nih angin thalai he Scheme hnuaia Training duhte tan kawng zau takin a inhawng a ni a ti. India rama kan thalaite thiam thil neihtir a, eizawnna ngialnghet kan neihtir loh chuan ram tan phur rit a ni thei dawn a. Training chhuakte chu kan ram siamna kawngah an tangkai thei dawn a ni a ti bawk.

Pi H. Lalchhandami, CEO, MzSRLM pawhin Power point presentation hmangin DDU-GKY Scheme hnuaia Training theih hrang hrangte a lem nen a entir a. Training duhte tan hian Registration hi chi 3 in a tih theih a. Mobile App download atangin, Kaushal Panjee website portal atang leh RD Department Office-a form lakchhuahin tih theih a ni. Training hi a thlawn vek tur a ni a, Training chhuakte hi 70% hna hmuhsak tura ruahman a ni bawk.

DDU-GKY Train duh tan register laiin Wage Employment select tur a ni a. Rural Self Employment Training Institute (RSETI) Training duh tan Self- Employment select tur a ni a ti bawk.

Vawiin Programme hi Pu R. Vanlalsawta, Project Director, DRDA Mamitin kaihruaiin chawhnu lamah RD Department Official te'n mipui kalkhawmte hi Workshop an neihpui nghal a ni.