1825/2025-2026

Aizawl, 26th August, 2025 : PHED Minister Prof. Lalnilawma chuan nizan khan “AMRUT-2.0” hnuaia hmalakna pakhat septic tank atanga chhuak ek tui lakkhawma, sawngbawl thianghlimna tur a kawngpui verh hna thawh mek a endik.

PHED Minister hian Dawrpui, Bazar Bungkawn – Vaivakawn road a kawngpui verh hnathawh mek chu a hmunah kalchilhin an hnathawh dante a endik a, he project hi a hlawhtlin ngei sawrkarin a duhin a ngai pawimawh takzet tih a sawi a, a hun taka thawk zo ngei turin contractor a chah bawk a ni. Minister chuan khawpui kawngpui awmdanin a zir loh avangin chhun lamah hna thawh a rem lova, lirthei veivak tamna hmun a nih vangin zan rei hnuah hna thawh tan theih chauh a ni a ti a; khawl lian hmanga hna thawh a nih vangin kawngpui leh a chhehvela chengte tan pawh thawm bengchheng a siam dawn tih sawiin inthlahrunawm a tih thu a sawi a, mipuite leh khawtlang hruaitu local council ten khawtlang tana tha tur tih hria a dawhthei taka an dawnsawn thin vangin lawmthu a sawi bawk a ni.

Minister chuan Aizawl khawpui bit takah hian septic tank tui mluan fimna tur soak pit nei tha lo leh nei lo hial te pawh kan la tam avangin septic tank leak leh paih ruah ngai kan tam hle a, septic tank tui hi a rimchhiat piah lamah natna hrik tam tak pai a nih vangin him taka dehral tur a ni a, he project hian hei hi a tum ber pawh a ni tih a sawi bawk.

Project hming hi “Sewerage & Septage Treatment Works for Zone-7, Aizawl City Small Bore Sewer, Tuikual Lui (AMRUT 2.0)” a ni a, Rs. 37,76,85,198/- senga thawh zawh tur a ni. A thawktu contractor hi Ace Alliance Pvt. Ltd., Guwahati, Assam an ni a, August ni 5, 2024 atanga thawh tan niin August ni 5, 2026 (kum hnih chhung) ral hma a thawh zawh tur a ni a, hemi hnu kum 2 chhung (August ni 5, 2028 thleng) an enkawlin an vil zui bawk ang. Pipe phum tur hi 31.41 km a thui a ni a, tun dinhmunah 3.6 km a thuiah phum tawh a ni a. Zan dar 9:00 atanga a tuk zing dar 5:00 thleng hna hi thawh thin a ni.

He project hmang hian Tuikual Lui a thli luang khawm veng hrang hrang 10 (Dawrpui, Chawnpui, Tuikual North, Tuikual South, Dinthar, Dawrpui Vengthar, Vaivakawn, Kanan, Khatla leh Zarkawt) ah pipe phum tur a ni a. He hna hmang hian kan ek thli te hi tui dawt hmanga lakhawmin sawngbawl thianghlim tur a ni a. Kan ek thli te leia thamral emaw luikawr a paih ṭhin te tihbona hmanrua a ni dawn a. Hei hian soak pit kan mamawhna ti bo in vantlang hriselna atan hmasawnna leh leimin laka invenna a nih ngei beisei a ni. He pipe hmang hian septic tank aṭanga thli tuiril lakkhawm hi sorkar ram MINECO ah a tihthianghlimna hmun Sewage Treatment Plant (STP) a sawngbawl tur a ni a. Heta thli tihfim tawh hnu hi leiṭha leh thildangah ṭangkai taka hman theih a ni. He STP hian nikhatah ek thli 3.5 million litres a tithianghlim thei dawn a, tin, hemi hmunah vek hian nikhata septic tank a ek 30000 litres sawngbawl thei tur Faecal Sluge Treatment Plant (FSTP) dah bawk tur a ni.

Minister hi PHED Secretary Pi Teresy Vanlalhruaii leh PHED officialte bakah Dawrpui Local Council hruaituten an tawiawm a ni.