1826/2025-2026

Aizawl, 26th August, 2025 : Vawiin khan School Education Department bul tumin a hnuaia hnathawk mek - mi 100 te chuan ATI Auditorium, MINECO, Khatlaah Ni 4 awh tur – Four Day Training on “Office Administration” an tan.

He Training hi School Education changtu Minister, Dr. Vanlalthlana’n hmanpuiin, School Education Department hnuaia hnathawktu hrang hrang Officer/ Zirtirtuten Office kalhmang leh sawrkar inrelbawlna bakah sawrkar hnathawk kan nihna anga an hriat tur hrang hrangte an hriat theihna tura buatsaih a nih thu a sawi a. Department chhungah inrelbawlna tha zawk leh felfai zawk a awm theihna atan training buatsaih a nih ang ngeiin zirtirtut pawhin zirtir hna mai bakah, office kalphung te, kan tih tur leh tih loh tur, dan leh hrai chi hrang hrangte hriat a tul thu te, Budget, Office administration leh e-Office thlenga hre turin IT lamah pawh tan lak a, hriat vek a tul tawh thu a sawi a. Tunah hian Mizoram Secretariat ah chuan e-filing system vek a ni tawh a, hei hi nakin lawkah Department pawh a la rawn thleng dawn a, transfer & posting te pawh digital veka tih a nih tawh dawn avangin heng process thleng hian kan hriat a la tul dawn a ni a ti.

Minister chuan zirtirtuten RTE Act kan hriat chian a tul thute, RTI Act, 2005 kan hriat chiana, zawhna chhanna leh min dawrtute lo dawr danah pawh tan laka, mawi taka lo chhawn thin turin a chah bawk.

ATI-in School Education hnuaia thawkte tan a a bika training a buatsaih chu lawmawm a tih thu sawiin, he hun hi hmang tangkaia, hlawk taka training nei turin a chah a ni.

He Training hawnna programme hi Pi Rita Lalnunmawii Pachuau, Director, ATI in Welcome Speech a sawi a, Pu David Lalthantluanga, Special Secretary, School Education leh Pi Angela Zothanpuii, Director pawhin thu an sawi bawk.