531/2025-2026

Aizawl, the 9^th May 2025 : Vawiin khan PHE enkawltu Minister Prof. Lalnilawma chuan Aizawl khawpui veng hrang hranga tuisem ni a tui put, tui liam leh mahni tui dahkhawlna a khah tawh hnua pawha tui tiliam thin chungchang chu a enchhin nan Aizawl veng pakhat (Khatla South) tlawhin PHE Department a thawktu – Pu Lalrinzuala Ralte, SE Aizawl WATSAN Circle, Pi Lalzuimawii, EE AWDD, South Aizawl leh Khalta South Local Council Chairman Pu P L Liandinga te nen tui sem dan leh tui liam te an en ho a ni.

Prof. Lalnilawma chuan Sawrkarin sum tam tak sengin mipuite hnenah tui thianglim a sem thin a, mipuiin tui man hi pe mahse khua leh tui tha angin tihtur mipuiin kan nei ve a, chu tui ren nachang kan hriat theuh hi a ni ti a. Tui leak (put) leh tui liam chu Department-in a ngaihmawh viau avangin tui put report-na App te pawh siamin hei hi tangkai taka chhawr mek a ni a, a ti bawk.  Mipui tam zawkin tui ren leh hlutna nachang kan hre bel tawh hle tiin, mahse thenkhat erawh an tui dahkhawlna a khah vek tawh hnua pawha a bill kan chawi alawm tiin connection off nachang hre lovin kawng leh kawr ah te an luan tir thin a, hetiang hi kan bansan a hun tawh hle a ni a, ti a. Tui ti liam fo thin te hremna dan siam pawh la ngaihtuah a tul thu a sawi lang bawk.

PHE Minister chuan mipui te chu tuisem niah an tui dahkhawlna a khah tawh hnu in connection off thin tur te, tui pipe leak a awmin rang taka App hmang emaw PHE thawktu emaw te hnenah hriattir turin leh mahni connection line te a leak em tih te chik leh vil thin turin a ngen a a ni.