532/2025-2026

Dated Serchhip, the 9^th May, 2025: Vawiin khan AH & Vety leh Horticulture Department changtu Minister Pu C Lalsawivunga chuan Serchhip a tlawh a. Centre of Excellence for vegetables hmun tur Zuangleng a mi a tlawh hnuin loneitute nena inkawm hona hun a neih pui bakah District Horticulture Office leh District AH & Vety Office a tlawh a ni. 

Minister hian Serchhipa Mat lui kama Nul siamtute hnathawh dan a hmunah a enpui a. Chhungkaw 160 velin eizawnnana an hman Chawm zau, Vaivenga zau, Chamdur leh Tuisen zau te a fangkual nghal bawk a. Loneitute hnathawh leh hmalak dan te enpuiin, Farming Society hruaitute nen an inkawm a. Horticulture farmer ten harsatna an tawh te leh mamawh an neih te Minister hnenah hian an thlen a ni.

Pu C Lalsawivunga chuan Serchhip Chanmari a District Horticulture Office a tlawh nghal a. DHO Pu R Lalrintluanga leh a thawhpuiten Minister hi lo dawngsawngin an Department hmalakna hrang hrang te an sawipui a ni. DHO office ah hian pa chi - mushroom spawn siam chhuahna laboratory an neih chu Minister hian a tlawh nghal a. He laboratory atang hian farmer te leh mushroom ching duh apiang ten awlsam takin pa chi an lei thin a ni. 

Horticulture Department Ditector Pu CH Lalmuanpuia kaihruainain thawktute nen inkawmhona an nei a, DHO Pu R. Lalrintluanga’n Serchhip District chhunga depsrtment hmalakna hrang hrangte a sawi a ni. 

Minister chuan thusawiin, ram intodelhlo kan la ni a, kan intodelh theih nana department in hma a lakna chu a chhuanawm tak zet a ni, a ti a. Dawhkana hnathawktu mai nilova a taka a hmuna thawktu kan nei hi a lawmawm em em a ni, a ti bawk. Loneitute kan kaihhruai thiam phawt chuan hlawk zawka thawk thei leh remhre zawkah kan chhuah thei ang a. Kuthnathawktute dawm kang a, puitu kan nih zel tura chahin, tun aia hmasawn zel tur pawha tan la zel turin thawktute a fuih a ni. Kut hnathawktuten kan ngaihsak a ni tih an hriat hian nasa takin hma an sawn phah ngei ang, a ti bawk. 

AH&Vety changtu ni bawk Pu C Lalsawivunga chuan Serchhip District AH&Vety  Office, P&E Veng a tlawh bawk a. District AH & Vety Officer Dr. H. Vanlalrawna leh a thawhpuiten lo dawngsawngin an hmalakna chungchangte a sawipui bakah thawktute chenna tur quarters sak mekte an tlawh hnuin Minister hi Aizawl panin a haw lehnghal a ni.