1210/2026-2027

Aizawl the 27th June, 2026 : Zanin dar 8:30 khan PHE Minister Prof Lalnilawma chuan AMRUT 2.0 hnuaia PHE project kalpui mek “Sewerage & Septage Treatment Works for Zone-7, Aizawl City Small Bore Sewer, Tuikual Lui” a tlawh.

Aizawl khawpui chep takah septic tank thli luanralna tur soak pit nei tha lo leh nei mumal lo an tam hle a. Septic tank thli kalna mumal awm lo leh vantlang drain/lui a luantir ta mai an thahnem hle. Hengte bakah hian septic tank sak dan dik tawk loh avanga paih ruah ngai a tam hle bawk. Septic tank tui hi a rimchhiat piah lamah natna hrik tam tak pai a nih vangin him taka deh ral a tul a ni.

Hei hi Aizawl dinhmun a nih avangin mipui hrisel nan Public Health Engineering Department (PHED) chuan project pawimawh tak “Sewerage & Septage Treatment Works for Zone-7, Aizawl City Small Bore Sewer, Tuikual Lui (AMRUT 2.0)” a kalpui mek a. Rs. 37,76,85,198/- senga thawh zawh tur niin he project hi Ace Alliance Pvt. Ltd., Guwahati, Assam chuan an thawk a. August ni 5, 2024 atanga thawk tania August ni 5, 2026 (kum hnih chhung) a thawh zawh tur a ni. Project zawh atanga kum 2 chhung (August ni 5, 2028 thleng) contractor te hian an enkawlin an vil zui bawk ang.

Pipe phum tur hi 31.41 km a thui a ni a, tun dinhmunah 8.6 km a thui phum tawh a ni a. Pipe phum hna hi Zan dar 9:00 atanga a tuk zing dar 5:00 thleng thawh thin a ni. He project hian Tuikual Lui a thli luang veng hrang hrang 10 atangin a lakhawm dawn a; chung te chu- Chawnpui, Tuikual North, Tuikual South, Dinthar, Dawrpui Vengthar, Vaivakawn bakah Kanan, lKhatla, Dawrpui leh Zarkawt veng hmun thenkhatte an ni.

Heng veng sawm (10)-ah te hian pipe phum tur a ni a. He hna hmang hian ek thli te hi tui dawt hmanga lakhawmin a sawngbawlna hmun tur (Treatment Plant) ah lui kawra paih hmain sawngbawl thianghlim tur a ni a. Ek thli te leia thamral emaw luikawra paih ṭhin te tihbona hmanrua a ni dawn a. Hei hian soak pit mamawhna tiboin vantlang hriselna atan hmasawnna a talen dawn bakah leimin laka invenna a nih tel beisei a ni. He pipe hmang hian septic tank aṭanga thli lakkhawm hi sorkar ram MINECO ah a tihthianghlimna hmun Sewage Treatment Plant (STP) a sawngbawl tur a ni a. Heta thli tihfim tawh hnu hi leiṭha leh thildangah ṭangkai taka hman leh theih tur a ni.

He STP hian nikhatah ek thli 3.5 million litres a tithianghlim thei dawn a. Septic tank khat tawh, ek paihna tur mumal a la awm loh avangin he project hnuaiah vek dian ek paihna tur Faecal Sludge Treatment Plant (FSTP) pawh STP hmunah hian a awm nghal dawn bawk a ni.