470/2025-2026

Aizawl, the 6^th May 2025 : Public Health Engineering (PHE) enkawltu Minister Prof. Lalnilawma hovin vawiin khan Conference Hall No 2, MINECO ah PHE Department hotu rualte, Disaster Management & Rehabilitation Department hotute, Aizawl Municipal Corporation aiawh te leh tlawmngai pawl 3 – Central YMA, Centre for Environment & Social  Justice (CE&SJ) leh Save The Riparians hruaitute chuan tunhnaia Tlawng lui nu vak chungchang an sawiho a, Aizawl khawpui mai nilo Mizoram khaw tam tak tan Tlawng lui chu innghahna anih avangin Tlawng dunga lui te leh tui hnar te humhalhna chu Department mal ni lovin High Level Committee ah sawiho nise tia rawt a ni.

PHE Minister Prof. Lalnilawma chuan Tlawng lui chu Aizawl khawpui tui tlanna ber anih avangin mi zawng zawngin kan veitlan a tul hle a, a humhalhna kawngah Sawrkar Department hrang hrang leh tlawmngai pawl hrang hrangte tan tan ho a mipuite zirtir chu thil tul tak a nih thu a sawi a. Tunhnaia tui awm reng si mahse tui a nut zual avangin pump theih loh a awm zeuh zeuh ta a, hengte hi a chhan hriat a, hma lak ngai te chu sawiho tha tia meeting chu koh anih thu sawiin CYMA leh environment lama thawktu pawl 2 te chu an ngaihdan te sawi turin a sawm a ni.

PHE Department in meeting ah an tarlan danin April thla leh May thla(vawiin thlengin) ni 4 ve ve chhungin tui a nut avangin tui an pump tam thei lova. Tui nu turbidity tehna NTU tia sawi a, 5NTU aia sanglo tur chu tui intlak a ngaih a ni a, tui a nut lain turbidity ni 900 – 1400 inkar te ni thin a, hemi vangin tui tih thianghlim chu hna hautak leh khawl ten a tawrh theih avangin tui pump theih zat nasa takin heng hunlaia a tlakhniam thin te an tarlang a ni.

Central YMA,  Centre for Environment & Social  Justice (CE&SJ) leh Save The Riparians hruaitute chuan Tlawng lui nut chhan nia an hriatte leh hma lak dan tur zau takin an sawi. AMC lam pawhin leivung paih chungchanga ruahmanna an siamte an sawi lang bawk a. Aizawl khawpui tui tlanna ber anih angin Tlawng lui humhalh chu mut mawh hnar mawha neih a tul thu te uar taka sawilan a ni a, rawtna hrang hrang siam a ni bawk.

Tlawng lui nut chhan chungchanga ah hian Department mal anga hma lak mai a theih lova, Department hrang hrang te nen tanho a hma lak a ngaih thu te, hemi chungchang zau zawka sawiho leh hma lak anih theih nan CM kaihhruaina hnuaiah High Level Committee din nise tih te, leivung/bawlhhlawh paih chungchanga tun aia tha zawk inkaihruaina leh dan mumal zawk te siam nise tih te, Tlawng lui dung enkawl leh tui hna te humhalh nan hemi atana a hranpa a Master Plan duan a tul zia te, dan lova leivung paih thin chunga hremna khauh lekkawh a tul thu te leh The Mizoram (Protection of Rivers) Act 2023 chu a taka hma a tul zia te chu rawtna leh thil sawiho te an ni.