3124/2023-2024

Aizawl, the 19th December, 2023: Public Health Engineering Department (PHED) leh Central Young Mizo Association (CYMA) buatsaihin zanin dar 7:30 khan Vanapa Hall, Aizawlah phut let nei miah lova khawtlang leh ram a fai theih nana thahnemngai taka thawktute chawimawina, 'Faina Thlentute Ni' hman a ni a, he hun hi PHE Minister Prof. Lalnilawma chuan khuallian niin a hmanpui a, faina kawnga hma la tha mi 46 te hnenah chawimawina thilpek a hlan a ni.

Khuallian Prof. Lalnilawma chuan kalkhawmte faina thlentute ni chibai bukin program ngaihhlutawm tak faina kawnga theihtawp chhuaha thawktute chawimawina hun hman a ni chu ropui a tih thu a sawi a. Faina chu chhungril atanga intan a nih thu sawiin, a lang chin mai piah lamah lang lo lam thleng pawha hmalakna tur a ni, a ti a. Faina tluantling nei turin a taka nunpuia nunphunga beh tir tlat a pawimawh thu sawiin, Sawrkarin theihtawp chhuah thin mah se mipui thlawpna leh tawiawmna a awm loh chuan a hlawhtling thei ngai dawn lo a ni, a ti a. PHE Department leh CYMA te thawhhona fakawm tiin, tanlak tlan zel a ngai a ni, a ti bawk.

PHE Minister chuan faina thlentu chawimawina hlante inpekna fakawm a tih thu sawiin, an hnungzui tura tanlak tlan a pawimawh thu a sawi a. Faina thlentu chu a taka thawktute an nih avanga entawntlak a tih thu sawiin, kalkhawmte chu an hniakhnung zuia zoram nuam, faina leh thianghlimna kawnga midangte entawntlak leh ram hrisel din tura thahnemngai taka thawhpuiah a sawm nghal bawk.

Er. F. Liantluanga, E-in-C, PHE Department chuan PHE Department leh Central YMA te'n September ni 14, 2012 ah tuihna humhalh kawnga thawhhona thuthlung an ziah thu leh, hemi bakah hian faina leh thianghlimna kawnga thawhhona thuthlung September ni 18, 2017 ah an ziah thu a sawi a. Hmalaknate awmze nei zawka bawhzui a nih theih nan PHED & CYMA Coordination Committee din niin khawpui leh thingtlangah lungrual taka hmalak ho a ni, a ti a. Faina kawnga thahnemngai taka thawktute chhuanawm a tih thu leh entawntlak a tih thu sawiin, faina leh thianghlimna kawnga thahnemngai taka ke pen theuh turin zoram mipuite a sawm nghal bawk.

Thusawitu dang Central YMA Vice President Prof. Lalnuntluanga chuan YMA in faina kawngah theihtawp chhuaha hma a lak thin thu sawiin, kum 1983 daih tawhah kum puan thupui hmasa ber atan 'Faina Kum' an hman thu leh faina chu changkanna leh hriselna, ram leh hnam humhalhna kawnga pawimawh tak pakhat a nih tel thu a sawi a. PHE Department nena thawhhona tuna kalpui mek chu 2021 a ziah, 2025 thleng awh tur a nih thu leh thawhhona tha leh hlawkthlak tak a nih thu a sawi bawk.

Faina Thlentute Ni puala hun hmanah hian faina kawnga theihtawp chhuahtu Mizoram hmun hrang hrang atanga thlanchhuah mi 46 te  chawimawi an ni a. Faina thlentute hnenah hian chawimawi nan pawisafai Rs. 10,000/-, Citation, Momento bakah mipa tan Thangchhuah Diar leh hmeichhe tan Puanchei te hlan a ni.

He hun hi Er. C. Lalremsiama, Secretary, PHE Department chuan kaihruaiin kalkhawmte lawmna thu a sawi a. Er. Lalrothanga, Chairman, PHED & CYMA Coordination Committee-in lawmthu sawiin hun hman hi a khar a ni.