PHE Department chuan an hnathawh thlirletna leh hmachhawp sawihona hun nihnih awh tur vawiin khan anmahni Conference Hall-ah an tan a, PHE Minister Pu S. Hiato leh Parliamentary Secretary Pu H. Zothangliana ten an hmanpui a ni.

Review meeting hi PHE Engineer-in-Chief Er. R. Lalfanliana chuan a kaihruai a thuhma a sawi hnuin meeting hmanpuitu PHE Minister Pu S. Hiato chuan PHE Engineers leh department a thawktu hrang hrang te tanrualna leh inpekna ah lawmthu a hrilh a. Minister chuan tun dinhmun ah Aizawl tuitlan mek kan khawpkham tawh loh thu sawiin sorkar laipui pawhin an fak leh hmalakna tura an sawi mawi ber ruahtui dawh khawl (rain water harvesting) ah tan lak nasa tul a ni a ti. Aizawl Greater Water Supply Scheme Phase II in Durtlang leh Saikhamakawn a thleng tak avanga mipui pawh an lawm nia a hriat thu a sawi a, Rural leh Urban Ministry, DoNER leh NEC atanga project chak tak a kalpui chungchang ah pawh department thawktute chungah lawmthu a sawi bawk. Pu S. Hiato chuan PHE Department chu achievement nei tha ber pawl nia a hriat thu tarlan in kum 10 hmalam a an thawh aia thahnem mah project/scheme tam tak tun kum 4 kalta chhung khan an thawk a ni a ti. Minister chuan PHE hnuaiah hian Asst. Engineer/SDO post 14 lai ruak chu hnawhkhah thuai tum a nih thu leh thawktute sawn kual chungchang ah pawh sorkar thil tihdan zawm thiam turin a chah a, tunlai computer thiamna thang chak tak man pha ve zel turin a fuih a ni. PHE Department a thawktute chu a lo va awm theih loh tui thianghlim mamawh mihringte pektu leh rawngbawl saktu an nih avangin midang aia inpek leh taimak a ngai em em a ni Minister chuan a ti.

Parliamentary Secretary Pu H. Zothangliana pawhin fuihna thu sawiin tih thin dan pangngai ngawr ngawr a kal aiin thil thar tha leh tangkai zawk zawng thiam turin a hrilh a. NEC hnuai atangin project hrang hrang khaw engemawzat ah thawh a nih tawh thu leh tun dinhmun ah phei chuan sorkar laipui a Ministry of Water Resources be pawp in an hnen atang hian Ruahtui dawn khawl lama ruahmanna atan Cheng vaibelchhe hnih lai hmuh beisei mek a nih thu a sawi a ni.

Vawiin nileng khan technical session neiin 2011-2012 kal mek hnathawh dan thlirletna leh 2012-2013 hmachhawp sawiho nan hun an hmang a. Er. Vanlallianzuala, CE (M&I) ; Er. Anup Chhetry, SE (Monitoring) ; Er. C. Lalhmahruaia, EE, S&S leh Er. C. Lallunghnema, Jt. Secretary, PHED ten an kaihruai a. Naktuk ah review meeting chhunzawm leh tur ah chuan thupui then hrang hmangin Er. HB Chakma, EE (Monitoring) ; Er. Anup Chhetry, SE (Monitoring) ; Er. Helen Rodingliani, AE ; Pu R. Lalruatkima, Hydrogeologist, PHED ; Er. Lalhmachhuana, SE (S&S); Er. Lalropuia Hmar, EE RWD Lunglei ten sawihona hun an kaihruai leh dawn a ni.