Nimin chawhnu khan PHE Secretary Pu VL Remthanga, IAS, leh PHE Department Engineer-in-Chief Er. Valbuanga ten YMA Conference Hall, Lunglei ah PHE Lunglei Circle staff te inhmelhriatna an neihpui.

Pu VL Remthanga chuan sawrkar hnathawk tam takin kan hnathawh tur kan hai thin a, hlawh lak ringawt buaipui lo a kan tih tur kan tih hian sawrkar leh mipui tan mi tangkai kan ni a ti a. PHE Department-ah mipui leh sawrkar laipui ten beiseina an nei sang a, mipui rawngbawltu kan nih angin min dawrtute lak ah hawihhawmna kan neih thiam a pawimawh a ni, a ti. Tui hna a that tawh loh avangin mipuite tui ren thiam tur a hrilh pawimawh a tih thu a sawi.

Er. Valbuanga pawhin mipuite nena in dawr an nih avangin biak nuam leh dawr nuam a awm turin a chah a. Computerised billing tih nan leh water pumping atan NED atanga pawisa engemaw zat an hmuh a beisei thu a sawi. Mipui tana theihtawp a thawk tur leh harsatna awm te chu sawi hreh lo turin a chah bawk.

Er. H. Duhkima, SE, Lunglei Circle chuan Lunglei Circle chanchin tawi tarlang in, Lunglei Circle hnuaiah working Division 5 a awm tiin, Lunglei Greater Water Supply chu kum 1995 atanga hman tan a ni, a ti a. Darkar khat chhungin cubic litre 450 pump theih niin, mahse tun kum hnih khat chhung khan thal laiin darkar khat chhungin cubic litre 113 chauh an pump theih thu a sawi. Tui semna hmun 14-ah awm in, tui connection 11764 an neih thu a sawi.